طالبة: وماذا بعد،، يا فيصل؟!!

اليوم قد يتم الإعلان عن نتائج الشهادة الثانوية، وقد يفرح طلابنا الأعزاء بدرجاتهم العالية، ولكن ماذا بعد ذلك؟! أرسلت إحدى الطالبات مسيرتها منذ تخرجها وحالها وبصوت عال يقول: وماذا بعد...؟! أترككم مع الطالبة القطرية ابنة هذا الوطن لتحكي بلسانها عن مسيرة معاناة في البحث عن المستقبل: السلام عليكم ورحمة الله وبركاته... أنا تخرجت من الثانوية بمعدل %93.3 قسم علمي سنة 2008. وعلى طول ابتعثني المجلس الأعلى، ودخلت الجسر واستمررت فيه سنة كاملة، جبت الإيلز والسات وأنا في الجسر، وتخرجت منه بأعلى الدرجات ومعدلي كان مرتفعاً.. بما أني كنت أبي أدرس هندسة قدمت على جامعة تكساس، وجاني قبول مشروط منها لأن الإيلز عندي (5.5) فقد رفعت تكساس معدل الإيلز المطلوب سنة 2009 إلى (6). دخلت تكساس وفي أول أسبوع يكون هناك لقاء تعريفي للطلبة قالوا لنا: «انتو الحين شايفين عددكم انتو الطلاب الجدد شكثر. نهاية هالسنة بس اللي بتموون منكم ما يقارب %20 «. وحاولت قدر ما أقدر إني أرفع الشروط عني من أول كورس.. لكن للأسف كان باقي لي 0.2 بس عشان ترتفع الشروط.. كملت الكورس الثاني مع الشروط القديمة وزاد عليهم شرط جديد كان مثل الصدمة بالنسبة لي وللطلاب اللي كان حالهم من حالي (مع العلم كنا كلنا قطريين وقطريات) وهو أن رئيس شؤون الطلاب الجديد سجلنا في مدرسة ثانوية أون لاين يعني على الإنترنت.. ندرس فيها بعد ما يخلص دوامنا من الساعة 3 العصر لين الساعة 7 المغرب شرط انكون في الجامعة جدام عينهم عشان يتأكدون إن احنا ندرس.. قلت أوكي مب مشكلة بكمل لأني كنت حابة إني أكون في هالجامعة وأتخرج منها.. كملت في هالمدرسة الثانوية لين قبل نهاية السنة بأسبوعين.. أخبرونا بأن عليكم البحث لكم عن مكان آخر، من يومها أنا ما داومت وراح تعب سنة كاملة في الهوا، وتذكرت الكلمة اللي قالوها لنا في اللقاء التعريفي إن ما راح يبقى منا إلا %20 بس.. وبالفعل ما تم أحد من دفعتي إلا القليل وينعدون على الأصابع. (هالكلام كله صار سنة 2009 -2010). قدمت سنة 2010 -2011 على جامعة قطر.. كان رقم القيد الخاص فيني مجمد من سنة 2008. ودخلت أول كورس لي في الجامعة وكملت في قسم الهندسة.. طبعا جامعة قطر بهدلت حياتي على المواد اللي المفروض تتعادل لي من تكساس وللأسف على كل هذه البهدلة ما تعادل شي.. قلت معليه مب مشكله أعيد من أول.. مر الكورس.. واجباتي وتطبيقاتي اليومية درجاتي فيها من أحسن ما يكون لين وصلت نهاية الكورس وبدأت الامتحانات.. وتفاجأنا احنا الطالبات بصعوبة الأسئلة اللي كانت مب طبيعية في مادة الرياضيات والكيمياء حلينا قد ما نقدر.. ويوم اطلعت النتائج معظم الدرجات كانت «مقبول».. استغربت لأن الرياضيات خاصة درسته نفس الكتاب 3 مرات قبل: مرة في الجسر وجبت جيد جداً ومرتين في تكساس وجبت جيد.. شالقصة يعني ليش جبت الحين «مقبول».. لما سألت البنات اللي معاي في المقرر درجاتهم نفس درجاتي.. قررنا نكلم المدرس.. رحنا مكتبه وكلمناه قال لنا بالحرف الواحد: تعليمات.. والسبب أن المباني ما تستحمل هالكثر طالبات مقارنة بمباني البنين.. تخيل! الحين مر على شهادتي الثانوية 3 سنوات.. وأنا من كل قلبي حابه إني أكمل دراستي لجأت للمجلس الأعلى ولم يرد علي، رحت قطر للبترول. راس غاز. قطر غاز. قافكو. واللجنة الأولمبية.. وكل واحد يقولي عذر.. اللي يقول شهادتج الثانوية قديمة. واللي يقول روحي درسي على حسابك كم سنة وبعدين يمكن نحولك على حسابنا. لا والأكثر من جذي أن قطر غاز قالوا لي بالحرف «احنا نبحث عن المبدعين والمتميزين» تخيل!! انزين انا شنو؟ ورحت قابلت رئيس البعثات اللي في كيوتل بناءً على التصريح اللي شفته بالجريدة. أن كيوتل تبي طلاب عشان تبتعثهم على حسابها.. المهم قال لي الأخ المسؤول إن هذا كله كلام جرايد وإن هم ما عندهم خبر بالتصريح اللي في الجريدة.. شالحل انزين..؟؟ كل الشركات قالوا لي إذا تبين بنوظفج بالثانوية الحين.. لكن ابتعاث لا!! كان عندي أمل أخير.. قلت على الله وتوكلت.. قابلت المسؤولين عن الابتعاث والدراسة في هيئة الطيران المدني. وصراحة ما قصروا.. ما قالوا لي شهادتك قديمة ولا قالوا إنهم يبحثون عن المبدعين.. بالعكس لما شافوا مجموعي اقبلوني على طول وتسهلت أموري وعطوني بعثة خارجية.. وأحسن شي في هيئة الطيران المدني أن الطالب إذا كان الإيلز عنده أقل من 5. يعطونه دورات إنجليزي عندهم في كليتهم لين يجيب الإيلز بعدين يبتعثونه عشان يكمل دراسته.. هذا حالي وحال كثير من الطالبات والطلاب القطريين اللي ما زالوا يعانون في جامعاتنا.. وإذا يا أستاذ فيصل حاب اتشوب نماذج حية من المعاناة مع الطالبات. أنا على استعداد أوصلك لهم..