لا حديث في العالم الآن سوى قفزة المغامر النمساوي فيليكس بومجارتنر من حدود الغلاف الجوي من ارتفاع يقارب الـ39 ألف متر، ليهبط إلى الأرض مخترقا جدار الصوت في 5 دقائق تقريبا. لكن الفيس بوكيين يرون الأمر بشكل مختلف تماما، معلقين على الواقعة بأحلى قلش جاء من شدة اندهاشهم من مدى تطور واختلاف الغرب عنا، فهم وصلوا الفضاء ويقفزون منه ونحن مازلنا على سطح الأرض ننبهر بقفزة أحمد السقا من الشلال على حد وصفهم. وإليكم بعض التعليقات الساخرة من قفزة المغامر فيليكس: - أول تصريح من فيليكــس بعدما نزل كوكب الأرض قادمــاً من الفضــاء.. قـــال: بعدما شوفــت كميـة الألــش بتاعت المصريين.. أنا راجــل عبيط أصلاً إنــي نطيـــت. - معلش سؤال ليه الناس مهتمة أوي كده بفيلكيس مكنتش نطة دي، تيجي إيه دي جنب نطة السقا في أفريكانو وهو بيقول بحبك، ولا جنب نطته في تيتو من فوق الكوبري، ولا النطة بتاعتي من فوق السرير من شوية كانت تحفة. - قالو عن قفزة فيليكس: البرادعي: قفزة فيليكس في الجو قبل الدستور هو منتهى الديكتاتورية. حمدين صباحي: يجب إعادة الانتخابات بعد القفزة. الثوار: إزاي يقفز فيليكس قبل حق الشهيد؟! الإخوان: نحن أول من دعا للقفزة. أحمد شفيق: إيه! أبوإسماعيل: أنا سعيد إنك قفزت القفزة دي. المعلم صبري نخنوخ: أنا أول واحد وقفت جنبه وعلمته القفز. عمرو مصطفي: النطة دي فوتوشوب. عمرو حمزاوي: هذه القفزة العالية لا تملك أي أيديولوجية فيزيائية ويترتب على ذلك أنها باطلة لأنه لم يدرس القوانين الفيزيائية المؤهلة لمثل هذه القفزة. توفيق عكاشة: وإيه يعني إن عم فيليكس نط من 38 كيلو.. منا وأنا في الكفر حدانا نطيت 40 كيلو.. أي والله. مدحت شلبي: وماشي فيليكس.. يا ولد يا فيليكس وهوبا النطة والبطة والقطة.. يانهاااااااار أبيض. - عشان أنا مصري أما أشوف نطة فيليكس.. مش هقول على نطة أحمد السقا يع. - فيليكس وصل الأرض في 5 دقايق، وأنا بقالي ساعة ونص في ميكروباص إمبابة ومش عارف أوصل بولاق. - فيليكس بينط من الارتفاع ده كله.. عشان يعملنا قوانين جديدة!! - دا مبقاش فيس بوك ده بقى فيليكس بوك!! أو كتبت 25 يناير ثورة الغضب: «تلات اربع اللي فرحانين بنطة فيليكس.. ميعرفوش أصلا قانون نيوتن عبارة عن إيه، نيوتن كان بيقول إن سرعة اختراق الجاذبية ثابتة وسرعة الإنسان مستحيل تسبق سرعة الصوت... ونيوتن أثبت أن سرعة السقوط الحر ثابتة. وأديها طلعت متغيرة، أنتم ا?ن تعيشون معجزة علمية حية».