* تقول أمي العودة: تقول الوالدة حصة عن ليلة النصف من رمضان في قطر، انسميها ليلة القرقيعان، ولول القرقيعان نروح عند سوق واقف كان عرشان وكان ايجيبون السنبل والبرميت واليوز والبيذان ونلخطه يميع، واييونا اليهال يقرقعون ويقولون: كرنكعوه كركاعوه كرنكعوه كركاعوه عطونا الله يعطيكم بيت مكة يوديكم يامكة يا المعمورة يا أم السلاسل والذهب يانوره عطونا من مال الله يسلم لكم عبدالله عطونا (دحبه) ميزان يسلم لكم عزيزان يابنيه يا الحبابه ابوج مشرع بابه باب الكرم ما صكه ولا حط له بوابه وبعد ما يدخلون البيت يغنون على ولد راعي البيت وبصوت جماعي ويقولون: لولا فلان ما يينا يفج الجيس ويعطينا الله يخليه لأمه ويلحفها بالساحة عن المطر وسياحه وبعد بعض النسوان يقولون حق اليهال بعد غنوا علشان يغنون على ولدها، وكنا نروح على البحر عند بيت صالح سليمان، ونروح ننقي الحصى الصمي اليابس اللي يقرقع ويطلع شرار، وله نختار صمي أبيض علشان نقرقع بهم علشان يطلع صوت. ونلبس بخانق ونعلق خريطة برقبتنا، والخريطة أو الكيس نسويه من خلج السواحلي المصوفر مب الأبيض، ولول بروحنا نخيط خرايط القرنقعوه لنا نشلله مني ومنيه بالأطراف ونسوي له خيط ونعلقه برقبتنا. وكنا نروح من بيت لي بيت ولول يعطونا شويه سنبل على شوية يوز وبيذان، ولول يحطون القرقيعان في منسف وله في جفير، ولي رحنا يات راعيه البيت وتطبق من الجفير وله المنسف طبقه بيدها وتحطه لنا في جيس الكركيعان، وتعطي كل اليهال طبقة طبقة من يدها. وهذه هي الأغنية كاملة: كرنكعوه كركعوه عيد قصير ورمضان عادت عليكم صيام كل سنة وكل عام اعطونا الله يعطيكم بيت مكه يوديكم ويحج بكم يا مكة يالمعمورة يا أم السلاسل والذهب يا نورة أعطونا الله يعطيكم بيت مكة يوديكم ويلحفكم بالساحة عن المطر وصياحه كرنكعوه كركاعوه اعطونا دحبه ليفه يسلم لكم خليفة كرنكعوه كركاعوه سلم ضيا الحبابه عن الوجع وأسبابه شيخه ماهي بعيابه كرنكعوه كركاعوه كرنكعوه كركاعوه يا شفيع الأمه سلم ولدها لأمه ويجيب المكه ويحطها في كم امه سلم ولدها يا الله ويجيب المدة يا الله لوما بنتكم ما جينا تفك الكيس وتعطينا تعطينا من مال الله يسلم لكم عبدالله اعطونا دحبه خيشه يسلم لكم عويشه كرنكعوه كركاعوه كرنكعوه كركاعوه يا عبير الحبابه ابوك مشرع بابه سنة الغلاء ما صكه ولا حط له بوابه يا بوابه... يابوابه كرنكعوه كركاعوه كرنكعوه كركاعوه عادت عليكم صيام كل سنة وكل عام أما في دولة الكويت فكان لها شأن كبير وجميل كانوا الأطفال ينتظرون هذي المناسبة وحتى الشباب منهم ينتظرون ليلة النص من شهر رمضان بفارغ الصبر، علشان يحصلون على كثير من المكسرات التي يمكن ما يشوفونها في الأيام العادية، وليلة القرقيعان تبدأ من الليلة الثانية عشرة ولمدة ثلاث ليال، وبعد يبدون يسوون أجياس القرقيعان ويعلقونها في رقبتهم علشان يحطون أبها كل ما يحصلون عليه من مكسرات، وفي ليلة النص يجتمعون يهال الفريج بمجموعات متناسبة في العمر ويكون ببينهم رئيس عليهم يشل في يده طبل أو علبة فاضية علشان يضرب عليها، وكان بعض اليهال يصبغون ويهم بالسنون علشان يتنكرون، ويقومون يطقون البيوت ويصفقون بقوة ويقولون بصوت عالي وهم يرددون ((سلم ولدهم،، يا الله،، خله لامه،، يا الله)) ويكررونها كم مرة، ولين افتحوا لهم الباب يقولون لهم أهل البيت قرقعوا على ولدنا، وإذا كان مثلاً اسمع عبدالله يقولون قرقعوا باسم عبدالله، فيقولون سلم عبدالله يا الله،،، خله لأمه يا الله ويكررونها كم مرة، وبعدين يقومون أهل البيت ويعطونهم القرقيعان، وقرقيعانهم يكون من المكسرات مثل اليوز، والنقل، والحب، والسبال المملح، والنخي، وفيه بعد نوع من النخي اللي ملبس بحلاوة، وفي بعد نوع ثاني من الحلويات المدورة اللي منها بطعم النعناع وفي أشكال وأنواع منها ويسمونها البرميت، طبعاً هذه الأشياء كانت تفرح اليهال في ذاك الوقت لأنهم ما يلاقون مثلها إلا في هذي المناسبة اللي هي ليلة النص من رمضان ليلة القرقيعان. ويبقون اليهال يلفون من بيت لي بيت علشان ايمعون أكبر كمية من القرقيعان، وإذا صادف أن أحداً ما فتح لهم الباب يقولون له أغنية خاصة بهذا، أم إذا فتح لهم صاحب البيت فيقولون له (يسوق الحمار والا ما يسوق)، إذا قال (يسوق) رددوا وقالوا (سلم ولدهم يا الله.... إلخ)، ويتمون على هالحال وهم يلفون من بيت لي بيت، وهذا بالنسبة للصبيان أما بالنسبة للبنات يقرقعون لكن مايروحون بعيد عن بيوتهم ويرددون ((قرقيعان وقرقيعان بيت أقصير ورميضان،، عادت عليكم كل سنة وكل عام،، يالله تخلي شيخه يا الله،، تخلها،، حق أمها،، عسى البقعة ماتخمها، ولا توازي على أمها)). وتستمر هذه المناسبة في الكويت لمدة ثلاث ليال حتى نصف الشهر. أما في فلسطين فأغاني الأطفال تتشابه، مثال بعض أغاني الطفولة ويقولونها في نفس المناسبة والطريقة اللي يتبعونها فيها نوع المرح علشان يعطونهم الحلويات والدراهم، ويشترك فيها الجميع من أولاد العائلات الكبيرة مع أولاد أصحاب المخابز والأفران ويسوون مثل الفرق الخاصة ويسمونهم (بالحواية) أو (المداحة) يدورون على البيوت من بيت لي بيت عقب مدفع الإفطار، ويوقفون في زاوية مظلمة من دهاليز البيوت وهم يرددون: لاولا (فلان) ما جينا حلوا الكيس واعطونا واعطونا حلوانا صحنين بقلاوه جايه علينا جايه بإيدينا العصايه تضرب الحوايه وارغفين شلبيات وارغفين حلبيات حي الله يا بلاد الشام فيها الخوخ والرمان دولابي دولابي يا سكر حلابي بعدين يقوم الرئيس فيهم وينادي بصوت عالي وينادي صاحب البيت وأهله و(يخلي له أمه) وايقومون اليهال ويرددون بصوت واحد (آمين)، بعدين يقول الرئيس فيهم (يخلي أبوه) ويرددون اليهال بصوت واحد (آمين) لين ما يقوم راعي البيت ويروح الدهليز ويوزع على كل واحد فيهم (الحواية) من اللي موجود عنده عاد يا حلاوة يا فلوس. أما في مصر اليهال هناك لهم أغنية خاصة تشبه جميع أغاني الأطفال في هذي المناسبة فيقولون في أغنيتهم: لما حوينا لما جينا يا الله الغفار ولا تعبنا رجلينا يا الله الغفار يحل كيسه ويدينا يا الله الغفار يدينا يا ما يدينا يا الله الغفار يدينا متين ريال يا الله الغفار وبعد في أغنية خفيفة يقولونها في مصر وتقول كلماتها: حالو يا حالو رمضان كريم يا حالـو فــك الكــيس ادينـي بقشــيش لا تــروح ماتجيــش يا حالـو أما في البحرين فإن القرقيعان يسمى القرقاعون، ويعتبر القرقاعون من أجمل العادات التي كان ولا يزال يمارسها اليهال في البحرين، ويقومون اليهال ويلفون على البيوت الموجودة في الفريج، والشيء نفسه يحطون جيس في رقبتهم ويحطون لهم أهل البيت ((النثار)) والنثار هذا يكون فيه من المكسرات مثل السبال والحب والنخي والبرميت، وبعد ممكن حد يعطيهم فلوس يعني قطع نقدية صغيرة، وكانت هالفلوس عندهم ثروة خاصة بالنسبة لعيال أول، وفي بعض المناطق كانوا يسون هالشيء في نص شعبان، ولكن الأغلبية في نص رمضان، وفي البحرين القرقاعون له أسماء وايد، مثل (اقريقشون، قرقاط، الناصفة، قرنقعوه، لكن الأكثر اللي يلفظونها هي لفظة (القرقاعون) وعندهم أغنية خاصة بهذه الليلة ويقولون فيها: قرقاعون عادت عليكم أو بالصيام من بين أقصير يالله يالله يالله يا الله اتسلم ولدكم ولدكم يا الحباب أو سيفه يرقع الباب سنة الغلا ما صكت ولا صك له ابوابه قرقاعون عطونا الله يعطيكم ببيت مكة يوديكم قرقاعون عطونا حنه أو بنه حتى تزورون الجنة قرقاعون عطونا احبيبة زبيب حتى تزورون الحبيب أو يقولون: اقريقشون حلاوة على النبي صلاوة أو يقولون: الناصفة حلاوات على النبي صلاوات عطونا من مالكم سلم الله اعيالكم عطونا من مال الله سلم لكم عبدالله عطونا حنه أو منه حتى تزورون الجنه عطونا احبيبة زبيب حتى تزورون الحبيب عطونا نخي وكنار حتى اتروحون النار أو يقولون: سلم ولدهم يالله أو خله لأمه يالله ايجيب المكدة يالله ياشفيع الأمة سلم ولدهم لأمه وايجيب المكدة وايحطها في كم أمه عطونا احبيبة زبيب حتى تزورون الحبيب أما الأطفال في المملكة العربية السعودية فهي لا تختلف عن كلمات أغاني الأطفال في الخليج ويقولون فيها: قرقع قرقع قرقيعان ام قصير ورمضان عطونا الله يعطيكم بيت مكه يوديكم يوديكم لأهاليكم ويلحفكم بالجاعد عن المطر والراعد واليهال في سلطنة عمان يرددون أغنية خاصة بهم واللي يقولون فيها: مرنقشوه يوناس عطونا شوية حلواي دوس دوس في المندوس حارة حارة في السحارة وإذا لم يحصل الأطفال على القرنقشوه يقولون لأصحاب البيت: قدام بيتكم صينيه ورا بيتكم جنيه * الكلمات الشعبية: ولول: أول القرقيعان: هو احتفال يقام في منتصف شهر رمضان لمضي منتصف الشهر وهو خاص بالأطفال. نروح: نذهب عرشان: جمع عريش ايجيبون: يحضرون السنبل: الفول السوداني البرميت: نوع من أنواع الحلويات اليوز والبيذان: من أنوع المكسرات ونلخطه يميع: نقوم بخلطه مع بعض واييونا اليهال: يأتون إلينا الأطفال دحبه: امتلأ. مشرع بابه: فاتح بابه الساحة: الغطاء راعي البيت: صاحب البيت ما يينا: لم نأت. يفج الجيس: يفتج الكيس ويقصد به كيس القرنقعوه. ننقي: نختار. الحصى الصمي: الصماء يقرقع: الذي يعمل صوت عند تراطمه ببعض بخانق: جمع بخنق وهو لباس قديم تلبسه البنات خلج السواحلي: نوع من أنواع الأقمشة القديمة المصوفر: يميل لونه للأصفر مب الأبيض: ليس الأبيض نشلله: أي نعمل له غرز خياطة معينة مني ومنيه: من هنا وهناك وكناية عن الخياطة منسف يات: جاءت راعيه البيت: صاحبة البيت أو ربة المنزل وتطبق من الجفير: أي تأخذ بقبضة يدها طبقة طبقة من يدها: أي قبضة كف كاملة من المكسرات يسوون أجياس: يعملون أكياس وهذه الأكياس خاصة بليلة القرقيعان يشل في يده: يحمل في يده ويهم: وجههم بالسنون: السنون عبارة عن السواد الموجود في قدور الطبخ يطقون البيوت: يطرقون على الأبواب المدورة: الدائرية.