نرحّب بجميع محبي الشعر في صفحتهم ملفى القصيد، ستجدون بإذن الله التنوّع في الطرح
وحرصنا على رسمكم أجمل اللوحات الشعرية والتي تمنح الجمال لملفاكم.. ملفى القصيد.
إعداد: محمد راشد المناعي
لمراسلة الصفحة: mohdalmanna3i@gmail.com
تابعوا مجموعة ملفى القصيد على موقع facebook بادخال عبارة «ملفى القصيد» بمحرك البحث في الموقع ، وعلى twitter:
malfaelge9eed@


سكة طويلة

الشاعر / عبدالعزيز بن عبدالله الشهراني

عطني حياتك لا بغيت الحقيقه
فيني من الآلآم سكه طويله
ما عاد ينفع ماي فوق الحريقه
جيب لي من القانون حاجه بديله
وش فايدة دستور يغدر صديقه ؟!
دام الأسامي ميته فالقبيله
خل الذي يمشي يّوقف دقيقه
عندي قصيدٍ بتركه في سبيله
دمعي أندثر يا صاح يم الحديقه
دافن بها الأحزان في كل ليله
جرحي ينادي يا ترى من يطيقه ؟!
أسمعّ تناهيده وصرخة صهيله
واللي يقول جروح قلبه عميقه
ما ذاق ما ذقته ونفسي عليله
وقفت وقفة شهم صعبٍ تعيقه !!
إلا إذا القاضي يشب الفتيله
هذا مصير اللي تدمر فريقه
وكلٍ على ما قيل ينفض شليله
والحب بستان القلوب الرقيقه
دون المقابل والسيوف الصقيله
واللي يّعد المال بأية طريقه
لآبد ينعش حلم الأحفاد سيله
واللي تعزوا ينتخي في رفيقه
يا للأسف لبوا جموعٍ قليله
والضربه اللي عاجزه لا تفيقه
مآهي تّغير شخص يبغي الذليله
خل الظلام اللي يّدور بريقه
يشكي على التاريخ يمكن يشيله
أنا الذي يجمع رفيق برفيقه
يعّدني صاحب ودايم دليله
حتى ولو قامت علي الخليقه
ماهمني دمع العيون الجميله
شوف الصديق اللي يعادي صديقه
تكثر حفرهم دون زرع الفضليه
ود الحروف المرّ يمكن تليقه
وأكتب على بابه قتيل وقتيله
هذي الثواني أعدمتها الدقيقه
وهذا الصبي يبغي يعاتب كفيله
هذي حياتي لا بغيت الحقيقه
فيني من الآلآم سكه طويله

الباب

الشاعر والإعلامي / راضي الهاجري

ذا الباب عيا ينفتح يا مريزيق
مهما طرقت الباب عنّك وعنّي
بابٍ نصوه خفاف عربٍ مطاليق
كلٍّ على ليلاه قايم يغنّي
احدٍ لفا مشتاق عشق الغرانيق
واحدٍ ورا الأرزاق زاد التمنّي
واحدٍ لفى فرّاع بين المخانيق
واحدٍ لفى منّاع لامّ التحنّي
واحدٍ لفى نقّال بعض التعاليق
واحدٍ رعى المعروف يا خال منّي
ماجيت أنا نقّال شفّ العشاشيق
وما جيت أنا كسّاب من سام فنّي
وما جيت أنا بيّاح سر المعاليق
وما جيت أنا فضّاح من يئتمنّي
وما جيت أنا شقّاق ستر المخاليق
وما جيت أنا دقّاق عظمي وسنّي
لو بي جنون الشعر طارن مطافيق
قيّدتهن بقيود حبل التأنّي
لو ينقضي عمري مغيّب ولا افيق
أبرك ولا انّي غارقٍ بالتدنّي
وان جيت أنا للباب مثل الطواريق
فرقي كبير وزاد بالخير ظنّي
لانّي عرفت انّي كبيرٍ وتدقيق
قولي بمدح اعداي يا شيخ كنّي
فارس قضى منّاع قومه من الضيق
واعداه من يمناه قامت توّني
لينه هوى هلكان من يبسة الريق
واجهِز عليه برمح مقبل امطنّي
لانّه صليب الراي صكّ المغاليق
دون الشرف والحق جا مستجنّي
هيبة مماته ما قضت دون تعليق
يمدح على مجناه وبلا تجنّي
وانا مثل ما قيل راعي شواهيق
في موكرٍ معروف ماني بادنّي
ولوني طرقت الباب عند المخاليق
منّي ترى مريزيق زاد التمنّي

بقول لك كلمة

الشاعرة / فتاة تهامة

الـيـوم يـالـغالي مـاهـو يــوم ويــروح
لا والله أعـتـبره مــن أجـمل هـداياي
يـأتي مـثل وردة شـذا عـطرها يفوح
ويـبـقى عـبـقها مـاكـنٍ فـي حـناياي
يـــا اعــز مـيـلادٍ لــه الـقـلب مـفـتوح
مـاهـو مـجـرد يــوم فـرحـة وسـلـواي
أغـليه واهـتف مـع حمامِ على الدوح
وأكـتب لـه الأشـعار مـن روح معناي
يـاغـاليٍ تـشـرق بـوجـهك مـع الـبوح
شـفني قصيدة تشغل الرايح الجاي
يـا اعـز مـن تـطرب على ذكره الروح
غـنت عـصافيري وجاك أجمل حكاي
مـالي ورى هـالشوق غـاية ومصلوح
الا وجــودك يــا اطـهـر الـروح ويـاي
الـيـا اجـتمعنا نـجلد بـوصلنا الـنوح
وتسمع رخيم الشوق مع نقش حناي
وأبـني بـعهد الـحُب هـامات وصروح
بـيني وبـينك يـحكم الـصدق والـرآي
بـقول لـك كـلمة على صدري تفوح :
كـل عـام وأنـته الحُب يا عطر دنياي

تشوّه
أحمد إبراهيم البدو

هذا أنا و الشوق بالقلب توّه
يطلب حنانك لجل ينسى جراحه
ما جيت لك صاحب ولا جيت خوّه
جيت أعشقك عشق الطفل للبراحه
يا معذبي و الحب مابه مروّه
منّه تطيح الروس و بكل صراحه
ياليت قلبي باقيٍ في خلوّه
إن كان ضعفي مايطيّح وشاحه
يا راعي الخد الندي من طروّه
أحسبه فلٍّ ما تلامسه راحه
الشوق جمري و الاحاسيس دوّه
الصدر مدري اش جرى في انشراحه
تدري حبيبي عاذلي ايش سوّه
من شاف بيني وبين وصلك مساحه
أعلن فراقك للعرب .. ماتروّه
ما قال يمكن ترجع ابكل راحه
ارجع ولو خدي حبيبي تشوّه
من كثر ماهلّت دموع و مناحه
يمكن تجدد في حياتي الفتوّه
يفرح خفوقي ويستلذ ارتياحه

حزن البارحة
الشاعرة / حنان العجمي


من ذنوبي إلى دمعاتي التوبه
إلى الحاجه وحزن البارحه واللي:
أشوف فبُعْدهم : أقدار مكتوبه
وش آقول ووش آعيد ومن آخلّي
بموت آطالب حقوقي ومطلوبه
بروح الحاصده من ضيعتي غلّي
كبرت الحالمه من عمر مسلوبه
صغرت الفاقده نفسي معَ من لّي
تصدّق لو أقول اليوم مغلوبه؟
بقى لي دمعة الماضي عقب ظلّي!
أنا بوجهك ونار البوح مشبوبه
بفلّ الصوت له مدّه يبي: فَلّي
أنا بوجهك من اللي كبّر جنوبه
على حرفي على اسمي على كلّي
أنا بوجهك من الدعوات والحوبه
تعال وكبّر بصدري آبصلّي
من اخطائي إلى تاريخ أكذوبه
إلى الفرقا وحلم الفارقه واللّي :
يقول إنّي بلا ملّه ومحبوبه
وأقول إنّه يساومني على حلّي