نرحّب بجميع محبي الشعر في صفحتهم ملفى القصيد، ستجدون بإذن الله التنوّع في الطرح وحرصنا على رسمكم أجمل اللوحات الشعرية والتي تمنح الجمال لملفاكم.. ملفى القصيد. لمراسلة الصفحة: mohdalmanna3i@gmail.com تابعوا مجموعة ملفى القصيد على موقع facebook بادخال عبارة «ملفى القصيد» بمحرك البحث في الموقع ، وعلى تويتر : :malfaelge9eed@ * يا بايع دينك الشاعر/ محمد بن مستور المري يابايعٍ دينك من أجل الموضه أنا عليك مسجل ملحوضه أغواك شيطانك وفكر أعداءك الين قمت تحلل المرفوضه أعلم ترى ماتفعله فالدنيا فالآخره في صفحة محفوظه الله يمهلنا ولا يهملنا غير انتبه لــ الدرب يوم تخوضه أرجع لــ ربك وأطلبه غفرانه قبل تغرغر روحك المقبوضه أشغل فراغك بالكلام النافع وخلك تصلي دائمٍ فالروضه لاينشغل بالك بأمور الدنيا وتأخذك من دين الولي وفروضه دنياك مادامت لناس قبلك لاتاخذك شهواتها المعروضه أعمل لدار المستقر الدائم دنياك ماتسوى جناح بعوضه * فرحة العيد الشاعرة/ شيماء الحراحشة الله من ليل الشقا و التناكيد والله من عينٍ تناثر بكيها والله من همٍ حجز له مواعيد والله يا حروفٍ عجزت أحكيها ضمنتها ما بين دمع و تناهيد عن لاتشمت بي عذولٍ سفيها أقول همي قل !! و آشوفه يزيد تاتي الحظوظ القشر لو مانبيها بيتٍ عجبني قمت أقوله بترديد لبنت عمي عل ما أعدم حكيها الله من وقتٍ خذا فرحة العيد قمنا ليالي العيد ما نحتريها * كل عام وانت بخير الشاعر / عمر العجرف كل عام وانت الحب ياعمري الجاي ياكل عمري يا ابتسامة شفاتي كل عام وانت بخير ياكل دنياي يافرحتي ياجنتي يا امنياتي مادام انت الخير و بدروبك خطاي لااتحيد عن درب الغلا ياغلاتي ياجنتي بالحب يا أصدق مناي يا أجمل إحساس انكتب باغنياتي غنيت لك عمري واطربت مغناي وعزفت بحساس الغلا لك شتاتي اول معاني الحب تكتبه يمناي واخر احاسيس الوفا لك مماتي يافاطمه قلبي على الحب يداي يانور هالدنيا ومعنى ثباتي كل عيد وانتي الحب في اول خطاي واخر خطاي العام انتي حياتي * العيد يحلى بك الشاعرة / إيمان هاني ذكرى الوداد اللي بنى في خاطري هذا السؤال أيام مرّت وانقضت وحسابها عندي سنين ليه الهجر في هالزمن قاسي وصعب الاحتمال؟ ناسٍ تبيع أصحابها بس لجل بالصوره تبين ! لحظات ياما عشتها أتفرّج هموم الليال أعيش فيها براحةٍ انسى بها كل الأنين ياللي نسيت أيامنا جاوبني وعطني مجال ابنشدك عن صاحبٍ يغليك بالشدّه يعين ! بالله قلي ما بكاك الشوق من أجل الوصال !؟ ؤلا طرا في بالك تزوره وتسأل عنْه وين !؟ إذا تريد الوصل مد كفك على كفي «تعال» العيد يا ذا الزّين يحلى بك وفي نورك يزين * وينك و وين العيد ! الشاعرة / وصايف تهامية وينك و وين العيد يا قلب قلي و هناك محرومٍ و لا هو بكيفه؟! العيد للي داخله عيد واللي يحس عيده يوم عايد و ليفه اللي يهلي و الحابيب تهلي واللي ملى بالسكر جيوب ضيفه العيد عيد اللي عذابه مولي ماهو لمن عيده علومه مخيفه عايد وهو فاقد عزيز ويهَلي في طيفه الغالي و لا غير طيفه يا شمس هذا العيد تكفين طلي على الغلابا في بلاد النكيفة مري على كل المواجع و هِلي فرحة من غصون الحياة الوريفة بأخواننا في دين الإسلام حِلي و استوطني ذيك القلوب النظيفه بالجوع بالموجوع ياعيد خَلي البائس يحس بحلاوة رغيفه مدامنا اخوان دين و نصلي لله وين اللي خويه حليفه؟ يا محتفل بالعيد أنا ذا محَلي باقسم معاهم عيدنا بالنصيفه أنا اعتذر ياعيد قلبي مع اللي محروم من كله و لا هو بكيفه * يامحلا العيد الشاعر/ محمد السفياني بأجمل فرحه ياحلوين تعالوا نجمع الباقين تعالوا نغني ياشطار مـن العايدين مـن الفايزين تعالوا يالله ياحلوين نعيد كل أهالينا ونتبادل تهانينا مـن العايدين مـن الفايزين يامحلا العيد ياحلوين احباب اقراب جمعنا وكلمة حب تجمعنا مـن العايدين من الفايزين * ازرع أجرك الشاعر / راشد آل سالمين فاقد الشوف بحياته لو يسمى ضرير قلبه يدله طريقه لو انه بمقطعه الله اكبر جل شانه ولا غيره كبير مكرم أبن ادم بخلقه والى جاع اشبعه يا رجيلي اكرميني بحسنش في المسير وابعديني عن وجيهٍ تقنع باقنعه ويا يميني لا تشحي بمدش للفقير مدتش للي يدور عطاش بتنفعه ويا عيوني لا تشوفي محرم والنذير طالبش جفنش لربي يسيل مدمعه ويا لساني لا تكلم وتخطي حق غير الخطأ في حق غيرك رصاصه موجعه وقتنا ماهو بثابت زمانه يستدير منكشف ماهو بلغزٍ ومن جاه رمعه به صلاح وبه فسادٍ وبه شرٍ وخير وابن آدم لو تكبر لربه مرجعه قلتها والله يعلم بما وسط الضمير والأجر ماهو يحصده سوى اللي يزرعه ازرع أجرك يابن آدم مثل زرع الشعير واسقه بفعلك ليومٍ تجيه وتجمعه يا إلهي لو أقصر فانا عبدٍ صغير يستجيرك يوم مابه زهاب وامتعه