سخر أدمن صفحة "إحنا آسفين يا ريس"،  كريم حسين، من تصريحات رئيس النظام المصري عبد الفتاح السيسي التي قال فيها إن "مبارك هو اللي جاب البلد على الأرض"، وذلك خلال اجتماعه الأخير مع بعض المثقفين.

وقال كريم حسين في تعليق له عبر صفحته على موقع التواصل الاجتماعي "فيس بوك": " اللي جاب البلد على الأرض ياريس هو اللي قال في 2010 إنه ستظل راية مصر خفاقة تحت قيادة ابنها البار حسنى مبارك وطلع بعد ما مبارك مشى وقال أنا قولت من 2005 إنهم مش هيمشوا إلا لما يخربوها  ، اللي جاب البلد على الأرض يا ريس هو اللي سمح وهو في المخابرات الحربية إن حماس تخترق الحدود بعربيات الدفع الرباعي وبالأسلحة الثقيلة و تقتحم السجون وتضربها بالمدافع وتهرب رجالتها وتدخل وتخرج بل وتخطف ظباط شرطة ومجندين من غير ما حد يعترضها ".

وأضاف: "اللي جاب البلد على الأرض يا ريس هو اللي حاكم وحاسب مبارك على قتل المتظاهرين مع إنه كان منزل حضراتكم من يوم 28 يناير  وهو اللي عمل نفسه مش شايف طنطاوى ولا باقي أعضاء المجلس ولا حاسبهم على مجزرة محمد محمود ومجزرة ماسبيرو ومجزرة إستاد بورسعيد ،اللي جاب البلد على الأرض ياريس هو اللي عمل أول حزب سياسي رسمي للإخوان المسلمين وجاب منهم رئيس وهو عارف إنه هربان من سجن وادي النطرون ".

وأوضح: "اللي جاب البلد على الأرض يا ريس هو اللي كان بيضرب التحية العسكرية لمحمد مرسي وكان بيقسم في فيديو شهير ليه إنه كان بيخدمهم لآخر لحظة ،اللي جاب البلد على الأرض يا ريس هو اللي ضحك على الناس وأخد منهم 86 مليار جنيه في تفريعة عمالة تخسر وبيسدد فوايدها من الأسعار اللي رفعها على الناس من الناحية التانية ،اللي جاب البلد على الأرض يا ريس هو اللي تاجر بفقر المواطن الغلبان في القنوات والخطب وقام رافع عليه الأسعار وشايل من عليه دعم المية والكهرباء والسلع ".

واستطرد "كريم" قائلاً: "اللي جاب البلد على الأرض يا ريس هو اللي طلع وقال للناس إن المية بتتباع بسعر قليل ومش هنقدر نبيعها بالسعر ده ولازم نرفعه، اللي جاب البلد على الأرض يا ريس هو اللي ضيع 36 مليار دولار احتياطي نقدي و 9 مليار دولار وديعة حرب الكويت ، اللي جاب البلد على الأرض هو اللي طلع وقال لوزير الإسكان أنا اللي بقولك ارفع أسعار الشقق، اللي جاب البلد على الأرض يا ريس هو اللي راح اعترف رسميا بسد النهضة ووافق على اتفاقية إنشائه ،اللي جاب البلد على الأرض يا ريس هو اللي الدولار في عهده بقى بـ10 جنيه لأول مرة في تاريخ مصر".

وأوضح مؤكدا: "اللي جاب البلد على الأرض يا ريس هو اللي السياحة بقت صفر في عهده ،اللي جاب البلد على الأرض يا ريس هو اللي جنوده عمالة تتقتل وتتدبح وتستشهد كل يوم وتتصور فيديو وهو يروح يقولهم ياريتنى كنت أنا ،اللي جاب البلد على الأرض يا ريس هو اللي بيتعامل مع رجال الأعمال بسياسة شخلل علشان تعدي اللي عايز ميدخلش السجن يشخلل واللي عايز يرجع يدفن في البلد يشخلل واللي عايز يقفل قضية يشخلل ،اللي جاب البلد على الأرض هو اللي استعان برجالة الراجل اللي جابها على الأرض في المناصب الوزارية والحكومية ،اللي جاب البلد على الأرض يا ريس هو عمال يستلف قروض من البنك الدولي ضعف عدد القروض اللي استلفتها مصر في تاريخها ،اللي جاب البلد على الأرض ياريس هو اللي ضحك على الناس المرضى الغلابة بجهاز عبد العاطي بتاع الكفتة وطلع في الآخر فنكوش".

واختتم كريم تعليقه بقوله: "اللي جاب البلد على الأرض ياريس هو اللي عدد الجنازات في عهده بقت أكتر من عدد الإنجازات بتاعته ،اللي جاب البلد على الأرض يا ريس هو اللي طلع يشحت على دولة 7000 سنة برسالة بجنيه ،اللي جاب البلد على الأرض ياريس : هو اللي مبيقبلش لأي شخصية ليها حضور في الشارع أو شعبية إنها تبقى موجودة في مصر على طول يبقى مكانها يإما في السجن يإما في التربة ،اللي جاب البلد على الأرض هو اللي ممكن يلفقلي قضية ويحبسني علشان بوست تافه زي اللي أنا كاتبه ده" .

جدير بالذكر إن عبد الفتاح السيسي ألقى بفشله خلال اجتماعه الأخير مع المثقفين، على الرئيس المخلوع "حسني مبارك"، وذلك بعد أن تدهورت الأحوال الاقتصادية والمعيشية وانهارت السياحة، والاقتصاد، وضاعت حصة مصر في مياه النيل بعد أن وقع "السيسي" وثيقة "سد النهضة" في إثيوبيا، وفشل في إعادة الأمن للشارع المصري، وأصبح الجنود هدفا للقتل في منطقة سيناء، بعد أن هجر "السيسي" أهلها لصالح أمن إسرائيل.


ح.أ/م.ب