كفَّيت ووفيت يا معتز.. بس نبي أكثر

طماعون لأننا نعرف أن هذا اللاعب عنده أكثر من اللي سواه ورفع فيه علم قطر، شد حيله ومعسكرات وتدريبات ونظام غذائي صارم جدا مع مدربه وبعد غير البعد عن الأهل والأصدقاء وترك حياته كلها عشان يتوفق ويجيب الذهب لكن الله كتب له الفضة والحمد لله. بيض الله وجهك ورفعت راسنا وإن شاء الله الأيام الجاية تكون أنت اللاعب الأول في الوثب العالي، وهذي مب بعيدة عليك خاصة أن أنت من الناس المحترفين في كل أمورك وهذا شيء يفرح. لكن يا معتز ترى إحنا نبي أكثر ونبي الذهب في طوكيو «يالله بالحياة»، وطبعا هذا المستوى وهذا الإنجاز تحقق لأن التخطيط للمعسكرات وتوفير كل سبل الراحة والترتيبات اللوجستية كان أكيد وراها إداري ناجح أو إدارة ناجحة وتتابع كل أمورك، لذلك أشكرهم أيضاً وأشكر كل من وقف مع معتز برشم، وأتمنى لك يا معتز أنك ما توقف عند هذا الحد وتبذل الجهد الأكثر والأكبر حتى تكون اللاعب الأول في العالم للوثب العالي. وأنت يا برشم الحين بطل في نظر أبطال صغار يشوفنك مثلا أعلى لهم، وعشان كدا أتمنى إنك ما تبخل عليهم لما بالزيارة، ولا النصيحة ولا حتى بأي شيء. مبروك الصوغة لكن الصوغة الأكبر هي حب أهل قطر لك وتشجيعهم والدعاء لك يوم السباق.

أهل شرق شدوا حيلكم ترى
الجماهير تعبت
بنخلي فقرة لقافة كل أسبوع على نادي واليوم بنختار النادي العربي إلى بصراحة عامل شغل حلو لا من ناحية المواطنين ولا من ناحية المحترفين وترتيبكم حلو وماشين صح والله يوفقكم، لكن أتمنى من لعيبتكم أن بعد يشدون حيلهم ترى الأندية الثانية مب أقل منكم وانتوا إلى تلعبون في الملعب ومافي فرق بينكم.. باقي بس أن تشدون حيلكم وتفرحون جماهيركم. جماهير العربي يبي لها بطولة، وبعدين شوف الملعب إذا ما حولوا الملعب إلى ملعب أكبر عشانكم أنا ما عرف شيء. عشان هاشكل أتمنى أن اللاعبين يشدون حيلهم ويقاتلون مب عشان يرفعون أساميهم في «الترند» العالمي لتويتر لا عشان الجماهير اللي تستاهل كل خير. الشيء اللي مب عارفينه اللاعبين إن العربي حتى وهو ما عنده بطولات بعد في صغار للحين يحبونه من بطولاته وسوالف أهلهم عن النادي. شدو حيلكم وفرحوا جماهيركم ترى لهم حق عليكم وبصراحة.. المنظومة الإدارية والفنية اللي سمعته أنهم في تناغم كبير من الاتفاق وتحديد توصيف المهام.

الاتحادات اللي ما سوت شيء


الكل يعمل في اللي يشتغل مع شو وفي اللي يشتغل بصمت وفي بعض الاتحادات تشتغل بصمت ولا جابت لا نتايج ولا لاعبين ولا حتى خليجية ما أفلحت فيها، وهذي الاتحادات هم اللي يبي لهم.
المهم أن الناس اللي ما سوت شيء نشوف وشو عندها وين كانت مشاكلها وكيف رتبت أمورها وليه ما سوت شيء، خاصة اتحادات الألعاب الفردية اللي من السهل إنك تكون بطلا.. إيه من السهل إذا مشيت على استراتيجية واضحة مب كل يوم مدرب وكل يوم تقول لا هذا اللاعب يصلح وهذا اللاعب ما يصلح. يا جماعة الخير المشكلة أن في بعض الأوقات عندنا الإداري يكون أفهم من المدرب وهذي مصيبة المصايب، وطبعا في بعض أندية كرة القدم لنا نماذج فيها. واللي أبي أسال فيه أنت دامك تفهم أكثر من المدرب ليه جايب مدرب، وتقول له سوي كذا وحط هذا اللاعب وشيل هذا اللاعب. المشكلة الثانية وهي أن هذا ولد هذا المدرب ولا هذا ولد رفيجي أبيه يطلع ويبرز، وهذا كلام مردود عليه وغلط، نعم غلط، لأن أهم شيء إنك تحط مصلحة البلاد قدام مصلحة هذا رفيجي وهذا صاحبي. وشكلنا طلعنا عن موضوع الاتحادات إلى منخشة تحت نتيجة ولا نتيجة وبطولة ولا بطولتين، بصراحة هذي الاتحادات أتمنى أن يبي لها نفضه عشان إلى بيجي بعده يعرف أن «الله حق» ويقوم بدوره على أكمل وجه وللعلم إحنا ما نشكك فيهم بس بصراحة شوية «مصخت».


شرايكم انخلي الحساب.. سلف
الكل الحين طالع يبي الاتحادات تتحاسب على المشاركة القطرية في الألعاب الأولمبية ريو، وهذا حقهم وحق كل واحد يخاف على مصلحة قطر ورفع اسمها وشانها عالي، وهذا اللي كلنا نبحث عنه وودنا فيه. لكن يا جماعة الخير لا ننسى أن الألعاب الجماعية ما قصرت وقامت بدورها، والرياضة فوز وخسارة ولا ننسى الماضي وإيش إلى سوه، باضرب مثال على كرة اليد واللي قبل المشاركة كانوا ماشين على خطط ومعسكرات ومدرب كبير ولاعبين على أفضل وأحسن مستوى، والتوفيق بعد ذلك من الله. الحمد لله أن كرة اليد في قطر وصلت إلى هذا المستوى وقبل شفتوا وين كنا والحين وين صرنا، يعني تطور، يعني لا بد أن نعطيهم فرصة أن يشوفون وين اخطوا ويصلحونها، هذا إذا كانوا اخطوا في شيء، لكن الحقيقة أنهم ما قصَّروا في شيء. باقول كلمة حق ولا أخاف فيها لومة لائم، أنا كنت مع منتخب اليد شهر أبريل في الوقت اللي لعبوا فيه مع المنتخب الألماني مباراتين، الأولى خسروا فيها والثانية فازوا فيها أبي أقولكم عن شيء شفته بعيني. انضباط اللاعبين وأداء التدريبات والالتزام بالجدول الزمني للجهاز الفني كل هذا كان متواجدا مع المعسكر يا جماعة الخير، كان تركيزهم عاليا أن عندهم مهمة وطنية ورايحين لها. لذلك أقول إن الرياضة فوز وخسارة، ومثل ما انت تشتغل ترى بعد غيرك من المنتخبات بعد يشتغل وهذي الخسارة مش معناتها نهاية العالم.. لا خلونا نبدأ من حيث انتهينا ونشوف تقارير الجهاز الفني والإداري وبعدها نقول اللي نبيه.

لقطة وتعليق
بعد فرحة الفوز لمعتز برشم.. أترككم مع الاستمتاع بهذه الصورة الجميلة