نرحّب بجميع محبي الشعر في صفحتهم ملفى القصيد، ستجدون بإذن الله التنوّع في الطرح وحرصنا على رسمكم أجمل اللوحات الشعرية والتي تمنح الجمال لملفاكم.. ملفى القصيد. إعداد: محمد راشد المناعي لمراسلة الصفحة: mohdalmanna3i@gmail.com تابعوا مجموعة ملفى القصيد على موقع facebook بادخال عبارة «ملفى القصيد» بمحرك البحث في الموقع ، وعلى twitter: malfaelge9eed@
مجاراة : شهر رمضان

شهر  رمضان أقبل  يزف التباشير
فرصة  عظيمة  قبل   يعلن   رحيله
المغفرة   والرحمة     لفاعل   الخير
وعتق   من  النار   بليالٍ    فضيله
والخاسر ان جينا نحسب المخاسير
من   يرقد   بيومه    ويسهر   بليله
الشاعر / بطي الحبابي

✦✦✦✦✦✦✦✦✦✦✦✦
بطي بيوته جات ذكرى وتذكير
وعلى مجاراته جذبني دليله
شهر رمضان اقبل وله موسم غير
وبه ليله تعادل  لها آلاف ليلة
واللي صيامه نوم من فجر لعصير
غير الضما والجوع وشهو حصيله
الشاعر/عايض بن جمان


✦✦✦✦✦✦✦✦✦✦✦✦
شهر رمضان اقبل وهذي السنه غير
حمول الامه معضلات ثقيله .
يالله تدبرنا على خير تدبير .
وتنجي عبادك يامنجي دخيله .
يطلبك عبد فيه نقص وتقصير.
زاده شوي والمسافه طويله .
الشاعر / عبدالله بن خالد الهاجري


✦✦✦✦✦✦✦✦✦✦✦✦
شهر الفضايل في السنه طابعه غير
له طابعً يفرق عن اللي مثيله
من ابركته ابليس مربوط بالسير
وماله على المسلم طريق ووسيله
الكاسب اللي يجتهد دون تقصير
يستغفر   لربه    ونفسه   ذليله
الشاعر / علي بن لدهم المري


✦✦✦✦✦✦✦✦✦✦✦✦
شهر المكارم غير و اطلالته غير
و الخير و الغفران جملة حصيله
يا اللي تحب الخير مالك معاذير
هذا الشهر غير و لياله قليله
العمر يمضي والليالي مقادير
و الرابح اللي ما يفوته فضيلة
الشاعر / علي الشنّاني


✦✦✦✦✦✦✦✦✦✦✦✦
الله يبلغنا صيامه علئ خير
ولاعاد باقي الا ليالي قليله
فيه العباده غير واوقاتها غير
واجره مضاعف فرض ولانفيله
ارجيك ياربي قبول وتياسير
وانا دخيلك يامنجي دخليه
الشاعر / حسين بن شتوي


✦✦✦✦✦✦✦✦✦✦✦✦
شهرٍ فضيل وله مكانة وتقدير
واللي يبى الرحمة يعرف الوسيلة
ويشد حيله يالرجال المناعير
فرصة عمرياكاسبين الجزيله
وأحذرك ياطالب الخير تحذير
احذر من النمه وهرج الهزيله
الشاعر/ علي غريب بن مايقه

شهر الصيام

الشاعر / حمزه الهاشمي
يا مرحبا في ضيف نرقب مجيه
بالعام  له جيه ويا حيها حي..
ضيفن زهابه عنه تقصر  يديه
يقلط على اذنوبي ويقلط على غي..
يالله وانا مالي لغيرك رجيه
ترحم وتغفر شخص مثلي وتهدي..
شهر العطا والخير مقبل عليه
الحمدلله يوم جاني وانا حي..
يالله عسا روحي تفك و بريه
العتق من نارك له ارجيك وادعي..
ادعيك يا ربي وبرفع يديه
عفوك و جنب ختمتي ميتة السي..
واحفظ لساني لا يجيب الخطيه
والرجل عودها على مسجد الحي..
شهر الصيام يمر مره و هيه
لا ايروح عامك ما عطيته ولا شي..
اغنم زمانك يالبنادم وصيه
وانشد لك اللي فاقدن من سنه خي..
واختامها يا رب تحفظ عليه
أمن الوطن و الدين والخير يا حي

يا رجّال !

الشاعر / محمد جار الله السهلي

يا رجال يكفيني عن اللي تقول وتدّعيه الصمت ،
ترى .. بـ الردى والعيب ما يفتخر رجال يا رجال
تغانمت مايحفظ وقاري ومقداري وشمت وقمت ،
مثل .. كلمتين عتاب عيّا عليها الشوق لا تنقال !
لو انك كفو لومي وتسوى مشاريهي شرهت ولمت ،
لكّن شرهة العقّال لو تارد .. بتارد على العقّال !!
يا كم واحدٍ يستاهل احب خشمه كل ما سلمت ،
وياكم واحدٍ واجد عليه ارحب وتكفيه كيف الحال
رياجيل اقلّطها على النايفه وترومها .. لا رمت ،
ورياجيل تبطي عظم قدّام اقلّطها على فنجال !
وبني عم .. لا ضاقت وشانت على ارقامها كلمت ،
وبني عم .. لا شانت لا والله ماغير ارقام فالجوال !
عليّ السلام الجم ، كم دارت الدنيا ولا استسلمت ،
اصارع لحالي دون وجهي واعز اسمي بجاه ومال
ابو تم وابن الطيب واخو الكفو يقدم على ما اقدمت ،
وضعيف الجدا والنفس لوّ اغتنى ما شفت منْه ريال !

الله خير الناصرين

الشاعر / حامد زيد
يِنْزِل الله النصر في ايدين مَــنْ
ينصره ، والله خـير الناصريــن
جيشنا اللّي طٓهّر تراب (اليمن)
وإنْتِصَر لأخواننا المستضعفين
( عاصفة حزمٍ ) خلقها الله لـِمَنْ
مالهم مع رايــة التّوحيد ديـــن
لَيْسَ مَنْ ينصر عباد الله كَــــمَنْ
ينتصــر للـتفرقــه بالمــؤمنـــين
كلــها وإن طوّلت ســاعه زِمَــنْ
ويرفع الله رايــة الحق المـــبـين
والوِجيه الماكــره تـدفع ثِــمَــنْ
مـــكرها ، والله خـــير الماكريـن

شبة النار
الشاعر / متعب عايض الزنغوب

لعل بيتٍ مابه دلال ووجار
ينهد من ساسه وتسقط ركونه
تنهد جدرانه على ارضه وينهار
ويطيح من عاليه ويزيل لونه
حيثآ ماله لرياجيل مقدار
ولاحدن على مثله تزايد غبونه
البيت بيت مكرم ً كل خطار
اللى على الجزله تشاخص عيونه
مقلطً لضيف له بن وبهار
وصنيتً للحيل للي يجونه
مجالسً فيها سواليف وذكار
ووقت الصلاه انحل مايجهلونه
للخيل خياله وللمجد تجار
وافعالهم منها العداه مغبونه
ماهي مجالس كل وأشي وهذار
طرادت النمه يحدد سنونه
ولد الردي دايم على الربع سبار
ولجل المعادي ماتسرك ظعونه
دايم على الهزله مخادع ومكار
ونفسه على الجزله تحاديه دونه
عليك باالطيب سند كل من بار
لكبرت الشطه قويه متونه
يعجبك في ممشاه من دار في دار
ويشيل حملك ماتزايد طعونه
الحر حر وله مسابيق ووكار
والبوم ماعمر العرب ايذكرونه