نرحّب بجميع محبي الشعر في صفحتهم ملفى القصيد، ستجدون بإذن الله التنوّع في الطرح وحرصنا على رسمكم أجمل اللوحات الشعرية والتي تمنح الجمال لملفاكم.. ملفى القصيد. لمراسلة الصفحة: mohdalmanna3i@gmail.com تابعوا مجموعة ملفى القصيد على موقع facebook بادخال عبارة «ملفى القصيد» بمحرك البحث في الموقع * إهداء إلى الأمير بمناسبة إقامة معرض كتارا الأول للمحامل التقليدية الشاعر / زيد الشحي هذي قلوب الناس كلها محامل جاتك تلبي وانت صدرك مواني وهذا الكرم والطيب تحصيل حاصل لانك سليل المجد من « آل ثاني» قومٍ من العليا قرومٍ اصايل يعرف قدرهم كل قاصي وداني غنت مع اليامال كل السواحل لين امتلت كل البنادر اغاني وترّس شراع الخير عالي يتخايل في غبةٍ زرقا وبرقٍ يماني رجال ما لانو عزوم وفعايل شقوا عنان الموج عشق وتفاني كلٍ من الاشواق والحب شايل صدره حنين وشوفته مرحباني هذا الخليج يفوح ود وتواصل بحره لآلي ورملته زعفراني يا دوحة الامجاد نلتي الطوايل زانج « ابو مشعل» ولبّى الأماني وما لج على وجه البسيطة مثايل قافي على تصوير حسنك عصاني لج في مراقي العز نجم ومنازل ولج في عرين الفخر ساس ومباني هذي قلوب الناس كلها محامل جاتك تلبي وانت صدرك مواني * زعيم آسيا - السد الشاعر/ حسين البكري زعيم منهو فالزعامه يطوله زعيم قاره حاز ارفع بطولات ( السد ) ماغيره بعرضه وطوله ( السد ) نال المجد يا ست قارات عن اسيا كاس البطوله ينوله دك الحصون الكوريه في سويعات زعيم يقرن دوم فعله بقوله عوّد جماهيره تذوق انتصارات الذيب ماهرول عبث ذي فعوله حقق بطوله رافع الراس هامات الفوز ذا هو فوز شعبٍ ودوله دوله لها في المجد صوله وجولات المجد كل المجد باروع فصوله والفخر كل الفخر بابسط عبارات ( العالمي ) اسمه وهذي ميوله كبير ياما دوم حقق نجاحات ( السد ) خلفه من سعى في وصوله ( السد ) خلفه ناس خيرة رجالات ناسٍ غدت للسد روحه وحوله ناسٍ قسم بالله فعلاً زعامات امثال شيخٍ نفتخر في اصوله شيخٍ يروم المجد له دوم غايات ( جوعان ) من يثبت كلامه فعوله ( جوعان ) راعيها زعيم المهمات شيخٍ سموه مايهم الحموله هامه لها في موطن العز رايات من نسل شيخٍ صامل الراي قوله شيخ الشيوخ اللي وقف خير وقفات ( بو مشعل ) اللي يكسي الخير زوله زعيم تفخر به جميع الدويلات و ( ولي عهده ) لو بغا شي ينوله ابو الرياضه دوم في كل الاوقات و ( جاسم ) نديم السد منذ الطفوله لامثال تضرب به بمعنى الولاءات شفتو نجاح ( السد ) هذي عقوله اللي تتكتك للزعيم النجاحات ( العالمي ) قومو معاي اوقفو له وابطاله اللي كل ابوهم زعامات ( السد ) وابطاله معي صفقو له زعيمنا اللي ابهر الست قارات * فقرة البرد الجــو الشاعر/ سالم بن أحمد البديد المناعي الجو يبغى له حبايب وعشاق من حولهم ورد وشموع وسوالف ماهوب جو ابيات واشعار واوراق الجو .. جو مسكة يدين وموالف أحدٍ ممنّي خاطره ضم وعناق واحدٍ على كشف المعاليق حالف واحدٍ مخالف .. نيّته زعل وخناق واحدٍ بشرع الحب .. ماهو مخالف واللي بكى من ضيقته .. دمعة فراق ? يرخص دموعه على وقت سالف كم من مفارِق شال دمعه بالاحداق ماوده بكثر الدموع ايتكالف قد قلتها للي كسر غصن الاشواق وامسى مع جرحي علي ايتحالف ودي بمثله .. بس مانيب مشتاق الحب وارد .. لكن القلب تالف * دفـئ المشاعـر الشاعر/ محـسن الحـمري الـجـوّ بـارد والأهـم دفء آلشـعـور! يحلى اللقاء دام المشاعـر دافيه وان صار سوء الفهم في بعض الأمور فـ اللّيل نشعـلها.. وتصبـح طـافيه دام الرّحابه كنـز مـخـفي بـ الصّـدور تبقى العلاقه بـ التفاهـم.. صـافيه وجـه الزّعل ينزاح.. ويْـحـلّ السّرور والوزن يضحكـ في عبوس آلقافيه! عادي!!.. يمرّ الحـب في لحـظة فتور وقْلوبنـا تنبــض .. وهـي متـجــافيه نبـعـد وكلٍّ له.. مـعَ الآخـر .. حـضور نخـفي مشاعرنا وما هـي خافيه!! لكـن.. يـعـود الـودّ.. وتفـوح العـطور لا باح احـد منّـا.. بكلـمـه شــافيه! مهما تهاجــر عن ملافيهــا.. الطــيور لا بــــدّ تلقاهــا .. تعــــوّد.. لافيه وان كان فينا قْصــور.. واللّه ما نبــور نحـمد ونشـكر.. ربّنــا ع العــافيه! ما نفتــرق عـن بعــض إلا فـ القبــور ما دام انا وافــــي.. وانتـي.. وافيه * دقة باب الشخص المتكامل بعد التحية ... يقول فرانسيس بيكون: « القراءة تصنع الشخص المتكامل» وبدوري أقول : القراءة هي التهام العقل للمعلومات المدونة على الورق ، والشاشة ، واللافتة وغيرها من الوسائل التي يمكنها أن تحمل لنا مجموعة من الحروف والكلمات .. ولكن .. كأني أسمع زقزقة عصافير بطون العقول ذات عصر تكاثرت فيه الثورات المعرفية بما فيها من فنون وأشعار وحكم ومقالات وغيرها ... أتساءل .. مع تلك الأجهزة المصاحبة لنا في كل مكان : كم من الوقت نستغله للقراءة؟ وعندما نقرأ : كم من المعلومات نستفيد؟ حينما نطرح فكرة الاستفادة فإننا لا نعني الاستفادة من كتب الحديث أو المجلات العلمية أو الملزمات الثقافية فحسب إن الاستفادة ممكنة بمجرد تصفّح مدوّنة أحدهم ، والتعرف على فكره ووجهات نظره .. إن الاستفادة ممكنة بمجرد متابعة شريط الأخبار فقط للتعرّف على مجريات الأحداث ! تخيل أنك حين تقرأ سطراً واحداً على الأقل فإنك تكسب أحد الأمور التالية : إما كلمة جديدة لم يسبق أن قرأتها في حياتك .. أو جملة مُصاغة بحرفية مميزة لم تمر عليك سابقاً أو حتى على الأقل ستعرف أن هناك سطراً مكتوباً في المكان الفلاني أو الموقع الفلاني ويحوي المعلومة الفلانية !! لك أن تتخيل الكمّ الهائل الذي سنجنيه على مدار أسبوع أو شهر أو سنة ! ولك أن تتخيل بنيتك العقلية مع كل كم ! لتقابل شخصك بعد أعوام وتقارن بين (أنت) في الماضي و(أنت) الآن ، ولتستشعر ما قاله فرانسيس بيكون! القراءة تصنع الشخصية المتكاملة ... أمة اقرأ .. والكتب حولك كثير والمدارس علمتنا كيف نقرا صدّق إن الوقت لو شفته قصير ممكن ان الحرف تاخذ مِنْه ذكرى كون واعي في مدى فكرك كبير كون قارئ ! زيد للتاريخ مجرى ! ولا أنسى أن أشكركم على قراءة هذه السطور