نشر أحد مستخدمي موقع التواصل الاجتماعي "فيس بوك"، رسالة عبر فيها عن حزنه على فراق زوجته المتوفاة، والتي لاقت إعجاب ممزوج بالحزن لأكثر من 66 ألف من رواد فيس بوك، وتفاعلوا مع الرسالة.

وعلق الكثير من المتابعين، برسائل المواساة، والدعاء بالرحمة والمغفرة للزوجة المتوفاة، والصور التي تعبر عن الحزن والبكاء.

وقال الزوج في رسالته الحزينة "زوجتى الحبيبة.. جه اليوم اللى لما أعوز أقول لكي حاجة لازم أكتبها لكي لأن خلاص مينفعش تسمعيني مينفعش تفهمينى عاوز أقول لك حاجات كتير".

1-اليوم مر 73 يوم على رحيلك والألم والحزن ولد كبيرا وما زال كبيرا.

2- رمضان كان وحش أوى من غيرك مش علشان الأكل الحلو اللي كنتي بتعمليه ولا الجلاش اللي ياسين مفتقده من إيدكي ولا السحور الجميل اللي كنتي بتعمليه لينا لأ افتقدنا أنفاسك.. افتقدنا تلاوة قرآنك.. افتقدنا صوت منبهك لتهجدك.. افتقدنا دعاءك لينا.

3-لينا راحت مسجد المدينة المنورة إمبارح في صلاة التراويح مع دكتورة مايسة علشان تحضر ختام المصحف علشان تدعيلك.

4- بكرة العيد وده أول عيد من غيرك من 22 سنة والله بحاول أفرح وافرح الولاد بس مش عارف على العموم أنا جبت لياسين لبْس العيد و حلقت له شعره وقصرته زى ما بتحبي تمام وجبت للينا لبس العيد ومن نفس المحل اللي بتحبي تشتري لها اللبس منه.

5- ياسين صلى ليلة 27 مع يوسف عمر ويوسف حميدو التهجد والفجر علشان يدعي لكي.

6- الحمد لله الولاد نجحوا في الامتحانات صحيح بدرجات أقل من كل عام بس معلش ظروفهم وتوقيت مرضك ووفاتك كان صعب جدا عليهم.

7- ياسين عنده بطولة في المنصورة تالت يوم العيد ادعي له.

8- عارفة ساعات كنت بزهق من مكالماتك وطلباتك وسؤالك إنت فين دلوقتي ؟؟ والله لو رجعتي تاني عمري ما هزهق ولا حتضايق من مكالماتك.

طب ارجعي كده وانتي تشوفي وحجيب لكي الزبادي من خليفة حتى لو تعبان و مش قادر.

9- مش حاعرف أصلى العيد بكره واطلع مالأكيش في البيت لأ السنة اللي فاتت انتي صليتي معانا في مسجد حسين صدقي.. المهم قولي لي العيدية حديها لمين ؟؟؟ ومين هيدي الولاد العيدية؟

على العموم أنا حصلي العيد وأجيب الولاد وأجيلك استنينا إحنا حنيجي بعد الصلاة علطول.

10- أنا مستغرب صفاء أبو السعود كل عيد بتقول العيد فرحة وأجمل فرحة !!!!

وأم كلثوم بتقول ياليلة العيد أنستينا.

بيتهيألي هم قصدهم على العيد زمان.

11- عيدك في الجنة إن شاء الله أحلى.. بصي هديتك السنة دية أبيات شعر للحلاج أهديها لكي يا رب تعجبك والله ما طلعت شمسٌ ولا غربت إلا وحبّـك مقـرون بأنفاسـي ولا خلوتُ إلى قوم أحدّثهــم إلا وأنت حديثي بين جلاســي، ولا ذكرتك محزوناً ولا فَرِحا إلا وأنت بقلبي بين وسواســـي، ولا هممت بشرب الماء من عطش إلا رَأَيْتُ خيالاً منك في الكـــأس، ولو قدرتُ على الإتيان جئتـُكم سعياً على الوجه أو مشياً على الرأس، ما لي وللناس كم يلحونني سفها ديني لنفسي ودين الناس للناس.

نعم ودين الناس للناس.. نعم ودين الناس للناس ‏مع ‏‎Rasha Sabeq‎‏.‏

شاهد التدوينة..