نرحّب بجميع محبي الشعر في صفحتهم ملفى القصيد، ستجدون بإذن الله التنوّع في الطرح وحرصنا على رسمكم أجمل اللوحات الشعرية والتي تمنح الجمال لملفاكم.. ملفى القصيد. لمراسلة الصفحة: mohdalmanna3i@gmail.com تابعوا مجموعة ملفى القصيد على موقع facebook بادخال عبارة «ملفى القصيد» بمحرك البحث في الموقع * صوت وصدى - الصوت لا ضاقت الدنيا الشاعر / محمد بن فطيس لا ضاقت الدنيا عليك وتشاويت خلق الله اللي في الرخا كان واجد ومن العرب والصوت والثوب مليت وقامت عليك هموم بقعا تراجد فارفع يديك لخالقك لا توضيت وادعو تراك اقرب الى صرت ساجد ووقت من أوقاتك للأوقات توقيت وسجل لنفسك في المساجد تواجد وأبشر بفزعة حامي الدين والبيت إلى هجدك من الهواجيس هاجد اللي يميت الحي ثم يحيّي الميْت لرضاه شِفْ كِثر البشر في المساجد - الصدى المساجد الشاعرالأمير / خالد بن سعود الكبير يا بوحمد كَفّيت والله وْوَفّيت قولك صحيح ولو يلاجد ملاجد يا مسلم اسمع عِلمْ من صار له صِيت واقضب نصيحة واحدٍ لك مناجد لى ضَكتك دنياك خَلْ التناهيت انصْ الإله اللي على الخلق ماجد تراك لى مِنّك ذكرته وصليت لك ركعتينٍ والخلايق هواجد تفرّجَت عَنْك الكروب وتسليت وقامت همومك في عيونك تباجد واعلم ترى المغبوط في الناس وبخيت اللي تعَلّق خافقه بالمساجد * معشوقة الورد الشاعر / أحمد اللنقاوي يا نجمة الليل قومي رحّبي فيها بنت الدلع ؛ يا حلاها و حي طاريها ام الولع ؛ لا مشت بالهون تتخطرف تاخذ قلوب البشر دقة خطاويها ما دام ربي عطاها الزين خلّوها تمشي على كيف ما الخاطر يودّيها ! اذا حكت ما تبي احدٍ يقاطعها حتى القمر وان بغت يسمع حكاويها وان وقّفت كل خلق الله تطالعها وان سلهم الرمش جاك القلب ناصيها ! كم فارس ٍساق خيله صوبها واقدم عوّد بلا خيل و يتَبّع حذاويها مسكين ؛ منهو عشق له بنت حوريه يضيع لا من تمشّى في حواريها تطيح من ثغرها لو تبتسم نجمه لا عاد تضحك ! نجوم الكون نبغيها الليل ؛ وان عدّته من شعرها خصله والشمس ما غير رمشة عين تطفيها ! معشوقة الورد ؛ كنّ الورد متحيّر مابين نرجس حلاها و بين كاديها مفروعة الطول ؛ بين الغيد تتباهى ! متواضعه لو تكآبر في تباهيها ممشوقة الجسم ؛ منحوت الخصر كنّه ! مصبوب جاهز و رب الكون معطيها مكحولة العين والخدّين جوريّه والشفّه الّي مَـ غير التوت يسقيها ! عنودة الصيد ما كلن تجي صوبه تغيض كل العواذل في تجافيها هي شيخة البيض تجرح لو تبي تجرح كل المعاطيب تبرى لو تداويها ! لو صغت فيها من الابيات مريّه تأبى حروف القصايد لا توفّيها اركد يا ذا الهاجس وخفف من السرعه لا يلحقك طيش ؛ هَد النفس هدّيها ! ما دامنا بخير و كل امورنا طيبه باقي التوآصيف تالي الليل نحكيها! * رد المراسيل الشاعر / محمد الهاجري عجل وخلصني ورد المراسيل خلاص خلص في عيوّنك حنآني العام لك داخل خفوقي مداهيل واليوم مالك في حيآتي مكآني مآشفت منّك إلا كثير الغرابيل غير الحزن والتضحية ويش جاني كم مرةً منّك ضعف فيني الحيل يوّمك تجآفيني وأنا أجيك عآني ألنآس نآمت إلآ أنآ تآلي الليل أجر طآروقي وأشد بعنآني اكتب شعر وأركب على غآلي الخيل اللي لهآ في ليلة السبق شآني شآعر ومن نسل الشيوّخ المشآكيل وأطوع اللي تعتصي في ثوآني ومآدآم لي في مآضي الوقت تبجيل اقطع لسآني لآ عصآني لسآني ووقتي لونه ضآق عآدي تسآهيل مآدآمني فآني وهالوقت فآني * طهر الطفولة الشاعر / علاء علي الوباري الشاعر اللي ما جهل نيشانه وشلون تخطي بالوصف قيفانه والقصد واضح والهدف متبين من حكمه اللي يصدره ميزانه في وصف من هي بالحسن مكسيّه بنتٍ صغيره عينها شيهانه تطوي الجمال بكمها وتفلّه معسولةٍ كنْ جسمها رمّانه فوقه الفروع مْسرّحه مبسوطه وجذور من ماي الطهر رويانه منها نما الساق وكبر وتفرّع والطير جاها يستظل بأغصانه اللي ملتها بالورق والرّقة وإحساسها اللي ما وقف هتّانه مع صدرها الوسمي وطيب أحواله لا فاح كنّه بالغلا ريحانه تحمل شذاها بالوفا لأنسامي ويفزّ قلبي منتشي شريانه من نفحة اللي ريحها عانقني بالود وشعور اللطف وإحسانه روح وجسد ما هي حجر معدومه فيها الضمير و إسمها إنسانه لكن تحوز بْطهرها والنيّه لون البياض وتنحني بأحضانه * دقة باب ? الشاعرة / أنثى جموح Ralph Waldo Emerson (4) بعد التحية ... ونعود للمرة الرابعة ، ومع مقولة جديدة من مقولات إميرسون ... حيث يقول : What I must do is all that concerns me, not what the people think يجب أن أفعل ما يهمّني ، لا ما يعتقده الناس ! وأؤيد هذه المقولة بشدة وأكررها دوماً ... فأنا من يحدّد اهتماماتي ، وأنا من يعرف ما يهمّني شخصياً وما لا يهمّني أعترف أن هناك مبادئ كثيرة وتقاليد قديرة علينا أن نحترمها وننهجها في أسلوب حياتنا ؛ ولكن ليكن لنا دافع شخصي ، وقناعة ذاتية في كل ما نفعله ! ليكن لكل منا توجّهاته الخاصة واهتماماته الشخصية دون تعدّي على الحدود ، ودون تمرّد على القوانين الصحيحة نحن خلقنا لنعش مرة واحدة ، ونعمل مرة واحدة ، وننجز ما نريده في إطار الشرع نحن خلقنا لنكن نحن .. لا هُم ! حين نسعى لما نسعى إليه فنحن من يبذل المجهود ، ونحن من يستنزف طاقته للحصول على الغاية المنشودة وما يمرّ من أوقاتٍ في فترة سعينا لا يمرّ إلا من أوقاتنا نحن ، وأعمارنا نحن ! عفواً .. عمرنا نحن ! فالعمر واحد فقط ! كن أنت ، وكوني أنتِ ... حدد غايتك ، وحدّدي غايتك ... لا تسمح لهم بتحديد مصيرك ، ولا تسمحي لهم بتحديد مصيرك ... الطريق الصحيح ، والأداء الصحيح هما أساس كل اختيار ... لنستخير الرب عزّ وجل في كل خطوة ... ولنسعى لما نريد ، ولما يهمّنا ... لا لما يريدون ، ولا لما يهمّهم ! ونصيحة أكررها لنفسي منذ أن قالها لي أحد الأصدقاء ذات مرة .. "كن كما تودّ ؛ لا كما يودّون" !! اختر إلـْ نفسك طريق واختر لـْ دربك رفيق لو تحسّ إنه يخالف ذوقك وْ غايَتْك ذرّه : ما يخالف ! لو تحس إنه يبيك اتسير وبـْ كيفه وجَرّه : قولِ آسف ! واختر لـْ نفسك طريقك ، حدّد أفراحك وضيقك ، وانت أدرى حدّد أهدافك وهمّك واتبع اقليبك وأمّك .. بس أمك أو أبوك ممكن إنك تستشير صاحب الخبره ، وعمّك وممكن إنك تستخير وشوف لك شيٍ يهمّك ! بس يهمّك انت .. وانت اللي تعَرْف اللي يهمّك !