نرحّب بجميع محبي الشعر في صفحتهم ملفى القصيد، ستجدون بإذن الله التنوّع في الطرح وحرصنا على رسمكم أجمل اللوحات الشعرية والتي تمنح الجمال لملفاكم.. ملفى القصيد. لمراسلة الصفحة: mohdalmanna3i@gmail.com تابعوا مجموعة ملفى القصيد على موقع facebook بادخال عبارة «ملفى القصيد» بمحرك البحث في الموقع ، وعلى تويتر : : Twitter: @mohdalmanna3i * دفتر .. سنيني الشاعرة / ورود الوفاء عمل شعري فريد من نوعه للشاعرة ورود الوفاء، وننتظر المزيد من هذه الجماليات الشعرية منها مستقبلا .. تصــفـَّح دفـتـر سنيـنـي .. إذا ودك تـلاقـيــني.. وجرب عيش هالساعة .. بأعمق منطقة فيني.. وإقرا كل ما بالجوف .. ولا يهمك شقــا الحروف.. ولاتوقف على سطوري .. تجاوز حزنها والخوف.. تصفـَّح بس بالـراحة .. تـراها جروحي نوَّاحة.. متى ما حسَّـت وجودك .. تصيح بقسوة ذبـَّاحة .. دخيلك لا تبعثرها .. شوي شوي سايرها.. وإذا ثارت كذا فجأة .. ترفق فيها واعذرها.. وإذا خايف من جروحي .. تعال أحكيلك بروحي.. وأقولك صفحة بصفحة ..عن أيامي وعن بوحي.. *** صفحتي الأولى طفولة .. كل حكاياتي سهولة كـانت الـدنـيا بسيـطة .. وكل شي أحلم أطولة.. جونا رايق وهادي .. والحياة روعه وعادي واللي مايمشي بمزاجي .. أقدر آجيبه بعنادي.. بعدها رحلة دراسة .. ضحك ومزوح ووناسة حلمـنا ننجـح بـالأول .. وكـل منـَّـا له حمــاسة.. ثـالثـة تحكي شبــابي .. بدء أيــام التصــابي يوم كل همومنا هي .. حفظ ودروس وغيابي.. *** ابذكريـــات الرابــعة .. حيـاتـنا بالجـامعة آخر محطات الفرح .. وأول جروحي اللاذعة.. بداية الهم والشقا .. صحبة علاقة أصدقا توفي تصدق تندفن .. تخدع تكذب لك بقى.. والخامسة حب وغرام.. أحلام يدعمها منام نهاية محصورة بألم.. مفقود فيها الإحترام.. السادسة جرح وغدر.. للعشرة ماخلوا قدر القوة ترفع فوق فوق.. والصدق والطيبة حدر.. السابعة صفحة ندم.. صفحة مليئة بالألم أماني راحت وانتهت.. حلم ٍ بنيته وانهدم.. الثامنة قصة عذاب.. جروح وآهات وعتاب أبكي وأشكي للقمر.. والصبح يعلن الإنسحاب.. مثل اللي حولي هالقمر.. يفدوني بكل العمر وإذا قضوا حاجاتهم.. راحوا وأهدوني جمر.. التاسعة حرقة ونار.. دمع وضحية وإنهيار أقــربهم لقلبي كـسر.. بعــدين رد الإعتبــار.. بالصفحة ماقبل الأخير.. أصحى بوعد إني أصير.. صلبة قوية حازمة.. وأرجع لي بنفس المصير .. وأعيد بي نفس السطر.. واتحرى بالغيمة مطر ولا تغــير فيـني شي.. أكــرر بنفس الشـطر.. هذي طباعي وقصتي .. مابيدي أبدل نيتي مقدر أكون إلا أنــا.. لو النتيــجة غصتي.. آخر سطر مامن جديد .. هذي أنا أكتب قصيد دمعي نزفته بانكسار.. وألملم جروحي أكيـد.. أسألك يامعطي عباده.. الستر والراحة وسعادة وغفران كامل زلتي.. واجعل من أحبابي زيادة.. * مجلس شعراء المحاورة القطري جرت هذه المحاورة بين الشاعرين عبدالله الغالي ومحمد آل منخس بمقر المجلس في مركز شباب برزان • عبدالله الغالي الليل ياراس المنخس مابقى غير النطاح انطح جبل واليا انكسر راسك تراها مكرمه الذيب يسري من مكان اليا مكان ولا استراح ماكل صيده يوم يقطع راسها تملى فمه • محمد آل منخس رأس المنخس لا برد راسك نهار الحرب فاح بالعز حتى لو يسيل إشويه إشويه دمه الذيب الأول من سبب جوعه يدوج فالمراح والذيب الآخر مستريح وماكلً كل اغنمه • عبدالله الغالي انا اعتبر هذا الكلام اللي تغني به مزاح الاّ تجيب اثنين حلاّفه وقاضي محكمه ماكل من يدخل في وسط السوق يلقى له رباح والطيب اللي كل ماحصـّل نصيبه يلزمه • محمد آل منخس الطير ما يقدر يطير ان كان مكسور الجناح اعلمك حتى لو انك كل علمً تعلمه طول حبالك زين حتى تاصل الجم القراح ما داعي اتحلل حرام ولا حلال اتحرمه • عبدالله الغالي حنا مانفزع لين نسمع من هل الديره صياح واليا فزعنا كل من يبغى الحزام نحزمه ماني محلل لي حرام ولا محرم لي مباح واللي يضيع يمته وقت الصلاه نيممه • محمد آل منخس والنعم فيكم يا بدو لو ان مامعكم سلاح تحضّرو معنى ترانا العالم المتقدمه ما اضيع اليمه ليا من قيل حي اعلا الفلاح يآللي تريخم وانت ما يلحقك عرق من ارخمه • عبدالله الغالي اللي يسبّل ثوبه الابيض تمشّى به وطاح عسى البنادم يرفع ايده فوق ويحط اقدمه ياهل الوجيه البيض فيكم ملح وطبوعٍ ملاح لكن ابو عرام لا ينطق وفي فمه اشحمه • محمد آل منخس يا ليل ما تقدر تطوّل واصلك نور الصباح الحي بامر الله يموت الميت الله يرحمه حنا الكفوف إلي كريمه والكفوف إلي شحاح ما تعرف الضيفه ولا تعرف تعامل ملحمه • عبدالله الغالي الله يبارك فالرجال اللي تدور للصلاح وان شافت الشيطان يومي بالعمامه ترجمه اللي يسمونه فليّح مايسمّونه فلاح وانته محمد شاعرٍ درب المراجل تزعمه • محمد آل منخس حنا نلحف كل مستبرد ويدفى بالسناح بزنودنا نقدر نشب النار من دون فحمه دام البلد فيه المباني والزباير فالبــراح يالغالي الغالي غلاك احشمك قدام احشمه * الضفّة المهجورة الشاعر والإعلامي: راضي الهاجري برادفورد- المملكة المتحدة أهدانا الشاعر والاعلامي القدير راضي الهاجري هذه اللوحة الشعرية النفيسة التي رسمها بانامل الابداع في الضفة المهجورة .. نترككم معها في ضفةٍ مهجورةٍ من شاطي النهر العتيق.. رسمت علامات الغياب بوجه من ملّوا الكلام.. ما عاد به من صاحبٍ وافي ولا باقي رفيق.. ما عاد باقي الا مواري شيمة الناس الحشام... اهنا رماد .. ودلّتين.. وذاك متكى للصديق.. اللّي تكرسع للمراجل يوم ولد اللاش نام.. اللي يزيّن دلته في وسع بالٍ ما يضيق.. ويقرّب الفنجال للّي عن يمينه باحترام.. بالٍ وسيع وخوّته مثل الذهب وسطه عقيق.. متجمّلٍ متكمّلٍ في كل شيٍّ يا سلام ... الريح تعصف.. والعويل ازداد مما لا اطيق.. سديت اذني.. ما نفعني والهجوم الشرس .. تام.. وينك سليل المجد.. وينك.. ساعدي عقبك عويق.. راح العوين اللي نعدّه محزمٍ ساعة زحام.. والقاع خالي والغراب اللي من اغصانه يويق... ازعج لي راسي والنعيق اللي يناعق به دوام.. اصبح مثار الفلسفة.. هل هو يليق او ما يليق؟.. وش يظلم الغربان غير انها مرادفة الظلام.. وش يظلم الغربان غير انها ملجلجة النعيق.. وكلٍّ تناسى اللي حفظ رحمه من أنياب الهوام.. وانا اخايل في المدى ما شفت بعيوني مضيق.. ما شفت أنا غير السراب اللي تبعني من منام.. ما ضاقت الدنيا ولكن .. ضاقت عيون الصديق.. وما خربت الدنيا ولكن.. زادوا عيال الحرام.. يا ضفةٍ فيها دفنت أشواق قلبٍ مستضيق.. ما غير ادوج وخطوتي عافت سلوك الانتظام.. دندن لنا العود وتثنّى ناينا الشعري طليق.. وقيثارة الشعر العتيقة ترتعش عندي مادام.. بيت الحنايا منهدم .. واركانه بمر الحريق.. يا من يطفّي شعلةٍ ما شيفت بعمر الأنام .. وارجع واطيح بمركبي وابحر وانا عيني تريق.. من دمعها كل المواجع قبل اغمّضها .. وانام.. * خواطر الزاوية إعداد: أروى خليل الكبيسي لنشر كتاباتكم النثرية في هذه الزاوية، يرجى إرسال خواطركم مرفقة بعنوانها واسم كاتبها إلى الإيميل التالي: arwa.khalil.18@gmail.com تراكمات فكرية بقلم : رانيا الرز وفي الليلِ بعد عتمةِ السهر في غفوة العيُونْ أسرق نفسي لتلك النافذة ذات التشابُكات التفكيرية المتراكُمة في منزِلُنا الهادئ ليلاً يملأهُ الضجيج نهاراً من قبل تخابُط الأشجار وصوت العاصفة الشديدة المخيفة، أسرق نفسي وفي عتمة الليل ضجة صاخبة تُصاحبُها أصوات مُتلعلِعة مُخيفة في كُل فجرٍ هوائيّ مُتقلب الهواء ،وكثرة التراكُمات الغُبارِيّة في هذه المنطقة وأخرى وأخرى تُشعِل التفكير الخوفي بِنا،، ولازال تفكيرُنا مُتراكِمَ لخبر أفضل، لرياح أهدء ، لراحة أكبر، لخوفاً أقل ! من بعيداً خلف النافذه أرى فتاة عيونها سهرتَ تعباً وارهاقاً شديداً وهي تنتظر رسالة من البعيد ، من تلك البلدة ، من ذلك الرجل ، الذي لطالما كانت وعُودهُ لتلك الفتاة الجميلة الرقيقة كثيرة ، تنتظر أمام النافذة وهي مفتوحة مستنشِقة التراكُمات الغبارية دون خوفها على متاعب جسدِها التي ستحدث لها بعد هذا الاستنشاق المُتعب المرهق، فأقل صواباً أفعلهُ بجوارِها هو تصبيرها فكرياً بِصمتٍ بِصمتَ .. ((اللهم إني اسألك خيرها، وخير ما فيها ، وخير ما أرسلت به وأعوذ بك من شرها وشر ما فيها وشر ما أرسلت به )) مسلم والبخاري اللهـم ارحمنـا برحمتـك ,, ولا تعذبنـا بخطايـانا