نرحّب بجميع محبي الشعر في صفحتهم ملفى القصيد، ستجدون بإذن الله التنوّع في الطرح وحرصنا على رسمكم أجمل اللوحات الشعرية والتي تمنح الجمال لملفاكم.. ملفى القصيد. لمراسلة الصفحة: mohdalmanna3i@gmail.com تابعوا مجموعة ملفى القصيد على موقع facebook بادخال عبارة «ملفى القصيد» بمحرك البحث في الموقع ، وعلى twitter: malfaelge9eed@ * سن الرشادي ! الشاعر القدير / محمد بن عيسى بن اسلوم الكبيسي نظرني جادلٍ عينه حدادي نظرني ووقفت دقة فوادي انا ظنيت جرح الغي يبرى أثاري جمرتي تحت الرمادي و كل عينٍ لها بالزين نظره يميل القلب من غير اقتصادي يحن القلب للماضي و يرجع ولكن يمنعه سن الرشادي بغيت أرميه لكنّه رماني قدر مترين مقياس ابتعادي وفاز ابرميته يومه طرحني رماني رميةٍ عقّر جوادي وخذ سيفي و رمحي واكتفاني و دبّر بي ولا ادري وين غادي حسين العود يوم أقفى ينود غزالٍ يطوي أنياط البيادي طلع لي بالزرج واظهر جماله فصحت الغوث يا رب العبادي يكافيني سبب هذا و شرّه ترى صبعي على راس الزنادي أنا واقف على ظهر البسيطة لكن أحس أنا ماني بعادي سقى الله وطرنا الماضي سقى الله و مقناص المها في كل وادي وطفلات الجوازي راتعاتي طوال الجيد زينات المقادي إلى جا سهيل خمسينٍ وزود وشاهدنا مباكير الغوادي تزمجر رعدها وانهل وبله وحوّل سيلها في كلّ وادي و رسمنا خْيالها عنا جنوب و نجم سهيل كنّه لي ينادي و جبنا ازمول حق شيل الحمول نقد السير مع ذيك العوادي معانا امدربٍ للصيد رامي عشانا ضامنه عنده وكادي لقاعٍ غيّه الوسمي و علّه وحلّوا فيه من حضر و بوادي والى بان الفجر وانزاح نشوه يزيل الهمّ عني والنكادي و قمت أدور في وسط الزهور طلوع الشمس نسناسه برادي و هذي منوتي والله داري بعيد من الحضاره والبلادي ألا ليت الشباب اللي مضى لي يعوّد لي مثل ما كان بادي لنا بالمجد سيراتٍ حميده نعز الجار وحنا له سنادي مثلنا بالعرب ناسٍ كثيره من الاجواد في كل العبادي ونسل صقور ما ظني تبور عسى اللي باقيٍ فيه السدادي حكى التاريخ عن حاتم و غيره على الصفحات يرسمها المدادي * يطول الليل ..! الشاعر / عبدالمحسن الخالدي يطول الليل .. ودروبي طويله يشيل اخطاي واوقاتي تشيله امر ديار ، اسوار ومباني ينوخ الوقت .. وعزومي رحيله سكنت وجيه ، واحلام و اماني ورحل بي عمر ما عيّن سبيله ضرير الشوف والعثره بصيره خسرت كثير وارباحي قليله صفيت اقدام مع عزم وجلاده يشيلن راس ما دنّق ذليله عزيز النفس والصبر اجتباني يموت إعِداي ما يشفي غليله اسج احيان وفجاجي وسيعه اشيل الحان واقدح لي فتيله ويميل سهيل مع شيلة خلاوي يكيّفْ الراس من بُن الجزيله حصاد قفار وابكار الشرايد يطيب الكيف باوصاف الكحيله زهاب الروح في روح القصايد وقصر الوقت بدروبي الطويله ويطول الليل وانشده النهايه واثاري الليل يتبعني دليله واثاري اخطاي ما ملّت مسيري واثاري الدرب ما كمّل جميله ! * قلب .. العنا ! الشاعرة / مي الحبابي يا ليت يا قلب العنا ما تولعت واهتز من نبرة غلاهم ركونك ضاقت علي كل الوسيعه ودمّعت كيف أتحمل صد من هم يبونك بعثرت لي كل الأحاسيس وأبدعت مدري غلا والا عمايل جنونك كأنك تملكت الخفوق و تربعت و عزفت في وسط المحاني لحونك صنت الغرام اللي من اجله توجعت وأقسم بودك لو كتب له يصونك سمعت انا نبض الخفوق و تروّعت واخاف لو كل الملا يسمعونك والا الغريبه كيف فيني توسعت ما كنت تتبعهم غدوا يتبعونك كبرت من بين الحنايا ترعرعت وأموت لي شفت الغلا في عيونك أسميك يا قلب العنا بينهم ضعت بعد أن يلوعك أو تلبي شجونك كأنك شربت الكاس بالهون وانصعت سلّم تراهم قد نووا يذبحونك * الستين !! الشاعر / راشد شرار الحمدلله يوم كمّلت ستين عمرٍ قضيته بين صوله وْجوله زرعت حبّي في ديار المحبّين واليوم زرعي صرت آجني امحصوله ستين فيها املاقي الزين والشين وصادفني الداني وراعي الحموله وأنا أميّز بالفهم بين الاثنين وآقدّر اللي ينفرد بالرجوله هذاك لو يأمر على الرأس والعين واللي يريده في حياته ينوله ستين فيها نلت لي ناس غالين معهم مؤسس بين الأحباب دوله سامي ولا اعاشر سوى ناس سامين ولي طالني بالحب لازم اطوله يحيطني حب المحبين جنبين واعيش به بالفخر عرضه وطوله * ليل الحنين ! الشاعر / محمد ابن مدعث تعب ليل الحنين وطاح جفنه و انتشى مسراي على همس الطعون و ذكريات الحب و اسراري بديت و لا انتهيت الا وانا بآخر دروب اقصاي اشارك قصتي هوج الظروف بسكة اقداري هنا صوت و هنا جرت رحيل و سالفة منفاي هنا كان الغياب اول دروبي واخر اخباري مشيت اقتل مشاعر و امنياتن كبرت بيمناي تباغتها الجفاف و يبس عاتقها على اسواري رحلت اول قتيل حي ما فكرت في قتلااي رغم شرهة عيون الحي بعيوووني و انا داري تجرعت الحياة اعتاب و استنزفت كل اعداي اليين اني بقيت انا الوحيد اعداي باشعاري صبرت و ليتني بالصبر حاولت اتنافى اخطاي قعدت اعيد نفس اخطاي من جرحي الى اعذاري غريبه كيف كممت المشاعر في حضور مناي غريبه كيف ما خليت له حاجه مع اصراري انا واللي رمى به في درووبي ما اختلف مبداي رغم كل الظروف اللي حدتني و اشعلت ناري جهمت ابحث لشمسه عن وطن و اخترت له دنياي بما فيه اغتراب الا اني اشوفه هو اسفاري يا هيه ارحم ذبول الحلم في بحه هزيم اغناي ترا ما عادت حروووفي تحمل نغمة اوتااري احبك و اعشقه و اهواك من طيفك الى ذكراي على بالك وشف بالك متى تجتاحه اذكاري اهيم بطلتك و استلهم اشعاري و اجر احداي و اغني لك من اشواقي جفاك النور يا ساري غيابك ما ترك فيني حضور و لا حضر شكواي تركني دون وجه و دون وجهه و ارتحل عاري انا ماني انا لا عااد ترجع تفجعك فحواي قطعت الووصل عني لين ذبلت جملة ازهاري خلاص انا رحيل انا جفاف من أولي لأدناي انا صحرااء روحي قاحلة لو تغرف انهاري معك كل امنياتي راحت ادراج الرياح (...........) معك ودعت قلبي و الحياة و سااير اسراري