نرحّب بجميع محبي الشعر في صفحتهم ملفى القصيد، ستجدون بإذن الله التنوّع في الطرح وحرصنا على رسمكم أجمل اللوحات الشعرية والتي تمنح الجمال لملفاكم.. ملفى القصيد. لمراسلة الصفحة: mohdalmanna3i@gmail.com تابعوا مجموعة ملفى القصيد على موقع facebook بادخال عبارة «ملفى القصيد» بمحرك البحث في الموقع ، وعلى twitter: malfaelge9eed@
أجامل النصاب

الشاعر / عبدالله بن شايق
الأجواد واجد و«المراجل» لها كساب
لكن واعد العشره ليا صرت جمالي
يطـير الشرار وكل ناراً لها شباب
و من ولع النيران يصبر على الصالي
تجارب حياتي معجزة و الدروب صعاب
و لقيت الرجال أنواع و ألوان وأشكالي
صديق الشدايد لا خذا منك علم وجاب
وسيع الصدر يضحك ولا هو  بزعالي
صديق الشـدايد ما ينافق ولا يغتاب
يدله غـريب الدار ويزّبن الجالي
وصديق الرخاء عقّاب ومصادقه عقّاب
شجاع الحكي والمدح بالقيل والقالي
صديق الرخاء ما غير صوره ولبس ثياب
يا ليته يبرقع ماله شماغ وعقالي
وعندي نصيحة جد ما قلتها لعاب
أقول الصحيح و نايم القلب يصحى لي
ترى خوة أهل الطيب يـالطيبين أطباب
يطيب السقيم وخوة اللاش سلالي
تغانم شبابك يا أبيض الوجه دامك شاب
ترى البدر لو يطلع قمر عود هلالي
فلا تهجر المسجد وخلك  وراء المحراب
ترى روضة المسجد لها منزل عالي
ولا تترك اللي يزهمك خايفٍ مرتاب
ترى الذل ما نجى الثعل ! بالتحيالي
ولا للنداء غير الفداء لو تروح إرقاب
و من ضاع شوره ياخذ الشور ويمالي
ومن باشرك بالعذر لا تلحقه بعتاب
ولا تشوف نفسك شيخ والناس عمالي
ولاتهين نفسك لو تجي بين ضرس و ناب
وهيبتك لا تنقص ولو ربع مثقالي
وبنت الردي لا يعجبك زينها الجذاب
تراها كما المخـيال خيل وتخيالي
ولو شفت حمر خدودها والثمان إعذاب
لابدك تمنى ليت ما جالك عيالي
ولدها ليا شاف اللقاء و الملاقى هاب
ذليلٍ بخيلٍ فيه خفخاف وجفالي
أخذ بنت قرم طَيباً ساسها ما عاب
تنومسك  بنت الشبل و يجيلك أشبالي
عيال الذياب تصير مثل الذياب ذياب
وعيال الثعالب مثلها زهر الأذيالي
وفرخ الصقر مثله وفرخ الغراب غراب
وبوم الخراب يقابل العش ويلالي
ليا صار راسك فوق يا طيب الأنساب
فلا ينحني “ لـ أقدام رجلين “ و نعالي
لكن الله اللي يكتب الرزق يا خطاب
هو اللي يفك الباب ويقص الأقفالي
ولا يهمل إلا واحداً عايفاً لـ أسباب
ولا ضيع حقوق البشر غير الإهمالي
وترى للقصايد كيف والكيف له شراب
وأنا ما أشرب إلا كيف راسي بفنجالي
ولا أطاوع الجاهل ولا أجااامل النصاب
أقدم يمين الحق و احط معدالي

قصيدة حب مكسوره

الشاعر / محمود الشاهين
بداية حبنا كانت لياليها تزيل أوجاع
وصرتي للأسف عندي قصيدة حب مكسوره
قصيده صاغها هاوي ولا له بالشعر مرباع
ينافق بالغزل لجلك عشانك فيه مسحوره
حسبتك بالوفا مثلي ولكن قلبك الخــّداع
بعد ما جــّرني صوبه طلعتي حييل مغروره
رفعتك في سما قلبي  طرحتي حبنا بالقاع
صدمني قلبك القاسي عوافي كنتي شطـّوره
تهنـّي دامها الدنيا بصفك والبخت لك راع
يجيلك يوم تبكيني ووقتك ينتهي دوره ؟
كفايه قلبي الوافي شرى حبك ولا هو باع
وانتي بعتي من حبك وغـّرقتيه  ببحوره
حذاري تخدعي غيري ترى مو دايمه الاوضاع
جرحتيني بهالدنيا واقولك حيييل مشكوره ؟!!

أكبر عيوب الرجل

الشاعر / بطي الحبابي
توعد وتخلف بـــدون اسبــاب
وأكبر عيوب الرجـل كذبـــــــه
الكــذب ياتيـــك بالأنشــــــاب
والصّــدق راعـيـه  ينقـذبــــــه
الصدق  منهل   مياه  اعذاب
وقطع الظما شربـــةٍ عذبــــه
والكــذب عدٍّ  ولـه  جــــــذّاب
يحذف بدلوه بعــد جذبــــــــه
يشره على اللي رقى المرقاب
اللــي كلامــه  يواخـذبــــــــه
ولا الردي ما عليه   أعتـــــاب
درب الردى  ضاري  هذبـــه
مْهرّج    للقفا    شــــــــذّاب
ما فيه  أحد سلم من شذبـــه
والعلة  اللي   بدون   أطباب
كذبــــه لاصار يْـتــلـذّذبـــــه
إن  شفت لك كاذبٍ مغتـــاب
عذ بالله الوالـــي  ولذبــــــــه
سبحانه الواحـــد الـتـــــوّاب
ماخاب  منهــو  تعـوّذبــــــــه
ودّك على  الكاذب  النصّــاب
يؤمر بحكــمٍ  ويوخـذبــــــــه
يكتب على جبهته كـــــــذاب
والحكـــم ليتــه يـنـفّـذبــــــه

فمان الله

الشاعرة / حرف العنا

فمان الله ودعتك وجبت امن الوداع سطور 
تضم حروفها اخر بقايا من وفا شاعر 
انا لو اشتكي منك يخالفني معاك الدور 
واحاول اخفي اهات الغرام بحرفي الحاظر 
كتبتك بأول الصفحه معاني تخدم الدستور 
ولكن فالهوى حظي واعرفه ماهو بشاطر 
عطيتك اجمل احلامي حميتك فالعيون الحور 
وغطيتك من غبار الهموم بطرفي الساهر 
الا ليته ضحك حظي قبل نشكي الألم والجور 
والا ليتك عرفت الحال قبل تصد وتكابر 
بلملم باقي اوراقي واخلي فالبقايا نور 
يشع بوجهك الطاهر اذا ماجيت لك عابر 
فمان الله والباقي جروحك ماعليها قصور 
عطتني درس خلاني على قطع الوصل قادر 
فمان الله لا تشكي شقى غدر الزمن والجور 
مادام انك قسيت اليوم انا بروح واهاجر

جنح الظلال

الشاعر / عايض بن غيده
غربة الروح شمس ً تحت جنح الظلال
وان حصلي ظلالً تحت شمسك فدى
يا عذابي صبرت شهور والصبر طال
لا حصلي مرام ولا ضميري هدا
المحبة شقى والحب جرفً هيال
تايهً من تهادى فيه لو اهتدى
وانت وصلك محال وحب غيرك محال
اشهد انك سرابً لا تبعته غدى
بارقً فالجنوب وبارقً فالشمال 
ما تشوق النظر لو ان ثراها ندى
كان ما عندك الا عذر مالك مجال
اصبح الحب صوتً ما يجي له صدى
وكان بيني وبينك كثروا بالجدال
خل بينك وبين اللي يردّك مدى
كل يومً يمر يموت عندي سوْال
وان حصلي جواب قبل موتي فدى