نرحّب بجميع محبي الشعر في صفحتهم ملفى القصيد، ستجدون بإذن الله التنوّع في الطرح وحرصنا على رسمكم أجمل اللوحات الشعرية والتي تمنح الجمال لملفاكم.. ملفى القصيد. لمراسلة الصفحة: mohdalmanna3i@gmail.com تابعوا مجموعة ملفى القصيد على موقع facebook بادخال عبارة «ملفى القصيد» بمحرك البحث في الموقع ، وعلى twitter: malfaelge9eed@ * درس جديد ! نص شامخ.. يرتقي إلى عنان الإبداع المبتكر بأجنحة الجزالة الحقيقية.. دروسٌ كثيرة يقدمها فيلسوف الحرف محمد جارالله السهلي.. الشاعر الذي نفخر به وبما يُقدم من رسائل أدبية عالية الجودة.. نترككم مع هذه الدروس التي نتمنى لها أن تصل وتُفهم.. الشاعر / محمد جار الله السهلي تقدم الدنيا لنا درسٍ جديد بكل يوم والناس تسلم من غثا الدنيا بحفظ دروسها !! وعلى حسب حفظ المواجيب وتعاليم السلوم نعرف مقاسات البشر بالمرجله ونقوسها صيت الرجال الوافيه بأفعالها.. ولاّ الرخوم ينبيك عنها: قل نفعتها وشين نفوسها تطرد ورى الدنيا وتكشخ بالمواتر والهدوم مثل (الحريم) أغلب دراهمها على ملبوسها والإمّعه والشايب الكذّاب وضعيف العزوم ناسٍ مع العالم بلا هيبه تدربي روسها !! والبخل: خلاّنه بهايم!! لا تسام ولا تسوم لا شفتها ترفع يدك حمْد وشكر وتبوسها على الصحن هم أول الجلاّس وآخر من يقوم يعيّفك حلو الأكل والشرب طول جلوسها ماهي بـ لللازم سند ولا ذخر عند اللزوم تموت ما سرّك مهايطها وكثر فلوسها وسوالف الخبلان.. رفعة ضغْط وصْداع وهموم فلاوةٍ تخطّف عْلوم العرب وتحوسها واجب عليك إليا حكت عن جملة حكاها تشوم الهند ما يرأس حكومتها سوى هندوسها وربع المصالح والمجامل خوةٍ ماهي بـ دوم اقولها والتجربه قطع وريدي موسها وقت الرخا.. مثل الصقور اللي على المرقب تحوم فيٍّ يذرّي ساقك الرمضا وحرّ شموسها وإليا احتمت صكّات بقعا وامست عْلومك علوم اتلوّي خششها وتجحد خوّتك وتدوسها من عقب ما انت الطيّب وقدرك معزّز ومْحَشوم تصير اردى ما خلق ربي ودم ضروسها أبعِد عن الأشكال ذي.. بُعد الثرى عن النجوم وش حاجتك في قرب رديان العرب ونجوسها ماهو بـ عيب إليا عْزموك تقول يالربع.. مْعَزوم ! العيب: لارحت لعزايمها وجيت عروسها وخلّك فطين تعلّمك دنياك درس بكل يوم والرجْل يسلم من غثا الدنيا بحفظ دروسها !! * معانق.. السجادة الشاعر والاعلامي القدير / راضي الهاجري قصيدة تحمل في طياتها الكثير من الاحاسيسس المتداخلة من الضيق والغربة التي لم تنزح عن كاهل المبدع راضي الهاجري إلا بتقربه من الله سبحانه و تعالى .. ضــاقت علي وانا غريب الغــربه.. وزيّـنتـها بمعــانـق الســـــجّــاده.. طـالب إلــهي لا تفضّــل طَـلبَــه.. ما رَد شـــاني لنَــاقد وحَسّــــاده.. ويا نفس ياللي للمعاصـي طَـربه.. توبي ترا يسرى الصــحف عَدّاده.. زاد المـعــاد بصـفـحـةٍ مخـتـربـه.. كـانـك تـظـنّ انّـك مـن العَــوّاده.. لكن عسفت الراي واطلق سربه.. جـيـشٍ من طيـور الأمل شَـدّاده.. لديـرة غــلا فيها اللحــد والتـربـه.. وديـرة وفــا للمـجـد والحَـمّــاده.. وديـرة نقــا فيها عــزاوي قـربـه.. عـنـقـي لـهـا ولأهـلـهـا سـَــدّاده.. يا الله .. هـَـوّن غـربة المـغـتـربه.. واكـرم نـبـاهـم والمَـلا شَـــهّـاده.. * قلب العنا الشاعرة / مي الحبابي الألم والهم والخوف الدفين والشقى والضيم وآهات العنا كلها لامست حروف قصيدة شاعرتنا مي الحبابي وفتحت آهاتنا وجروح قلبنا الدفينة ولكن زرعت بداخلنا شوقا مع عتب وأنينا في حنين الماضي فنترككم مع عذوبة هذه الأبيات التي تمزق جوارح القلب وتدواي العله. يا ليت يا قلب العنا ما تولعت واهتز من نبرة غلاهم ركونك ضاقت على كل الوسيعة ودمعت كيف أتحمل صد من هم يبونك بعثرت لي كل الأحاسيس وأبدعت مدري غلا ولا عمايل جنونك كأنك تملكت الخفوق وتربعت وعزفت في وسط المحاني لحونك صنت الغرام اللي من أجله توجعت وأقسم بودك لو كتب له يصونك سمعت أنا نبض الخفوق وتروعت وأخاف لو كل الملا يسمعونك ولا الغريبة كيف فيني توسعت ما كنت تتبعهم غدوا يتبعونك كبرت من بين الحنايا ترعرعت وأموت لي شفت الغلا في عيونك أسميك يا قلب العنا بينهم ضعت بعد أن يلوعك أو تلبي شجونك كأنك شربت الكاس بالهون وانصعت سلم تراهم قد نووا يذبحونك * شط الأماني الشاعر / عبدالرحمن الملا الحمادي الشاعر المبدع عبدالرحمن الحمادي، من النجوم القادمين بكل قوة إلى الساحة الشعرية، ترقبوه فأول غيثه إبداع ! يقول اللي رسا بشط الأماني تعلم من جفا طول السنينا خذاني الشوق واسرا بي ودعاني معا قلبي سرينا و عازمينا على طاريك بأمواجه خذاني بحر فرقاك لي منه ارتوينا قطعنا لك بحر مابه مواني على موج الوله دورت مينا وابحرت بخفوق(ن) لك حداني ولا أدري لوين احنا سرينا؟ سعيتك كثر ما ربي عطاني انا وقلبي على شاطيك جينا نمني عيننا بشوفك ثواني رغم هالبعد ماجفت يدينا وجيتك و الوله فاض وكفاني بلا قلبي يصيحك هالسنينا وجيتك والبعد جمر وكواني وصبر القلب لك صبر السجينا وجيتك وأثر شوقك لي نساني و انا منهو حمَّله براحتينا ودام اني وصلت لهالمكاني ابتكلم انا و قلبي رجينا ووقف كل حكي(ن) من لساني وصار الدمع لك يحكي الحنينا يقول اللي رسا بشط الأماني بلا حبك ترا ما عاد فينا * عفا.. الله الشاعر المرحوم / حسن بن فرحان النعيمي ‏‏عفا الله، يا عين من النوم جزاعه وقلبٍ من الفرقا ملولٍ وجزاعي ويا لوف قلبي لوف بستان زراعه إلى زان هبته اللواهيب وانلاعي ولا القلب من حد الرهيفات قطاعه من البعد والهجران واخطا التوقاعي وانا وين بدله من هل البر واسناعه ومبدى يهبه من هو العصر ذعذاعي وانا يا (حمد) عيني من النوم منصاعه هوى كل نجمٍ في مغيبه، وانا واعي واعد الشهر باليوم، واليوم بالساعه ولا لي من الونات والناس هجّاعي عنا القلب بذتني طواريه وأنواعه ولا واهني اللي له القلب مطواعي إلى من عذل قلبه حزين ولا طاعه عوى بالغلايل عوية الذيب لا جاعي على اللي خذت قلبي وسيقٍ، وطمّاعه وحالي سبايبها مريضٍ ومنلاعي بازوره على اللي زاد بالني مرباعه ودون المشاهي ما بعد حده الراعي ولا سامه الشراي من عند بيّاعه ولا قد مشى يومٍ مع حملة الساعي زها فردةٍ كنها من النجم لماعه وصوت المغني يوم يوحيه يرتاعي إلى سمع صوت مغنيٍ كن تهملاعه طموحٍ لها الملعب تهزّع تهزّاعي إلى حققت من صوت راعيه سماعه هوى مثل شاهينٍ سمع زقرة الداعي