نرحّب بجميع محبي الشعر في صفحتهم ملفى القصيد، ستجدون بإذن الله التنوّع في الطرح وحرصنا على رسمكم أجمل اللوحات الشعرية والتي تمنح الجمال لملفاكم.. ملفى القصيد. لمراسلة الصفحة: mohdalmanna3i@gmail.com تابعوا مجموعة ملفى القصيد على موقع facebook بادخال عبارة «ملفى القصيد» بمحرك البحث في الموقع ، وعلى تويتر : :malfaelge9eed@ * بوح صورة انتهت مسابقة بوح صورة من إعداد قروب انكسار المشاعر على البلاك بيري بإدارة بندر الرشيدي PIN:219B3211 ونضع لكم المشاركات والمراكز حسب التصويت ... 1) الشاعر عبدالله الطامي : على شان الوفا نروي ضماء اعروقنا فالما ولو هي قطرةٍ وحده انا وياك نرويها واذا ماهيي بتكفينا انا عادي ترا اضما لانك لا رويتيها تراني مهتني فيها 2) الشاعر يوسف سلامه : ما بيدّي يا عصافيـر الضّمى غير قافي و الدُعا واللّه كريم ضُعفكم ، يا ويل خفّاقي كَما لوعة الفقدان ، في قلب اليتيم 3) الشاعر محمد بشير العنزي: شحتّ ضلوع الناس قبل الهماليل تعصي و تنشد خالق الكون مطره تبغى غيوم اتغرق الارض بالسيل و يا ليت تسقي هالعصافير قطره 4) الشاعر محسن الحمري : يا ليتني ويّاك مثل العصافير نروي ضما الاشواق بايّة طريقه لا تقتل احلامك بكثر المعاذير جاهد وخلّ الحلم يصبح حقيقه! 5) الشاعر محمد بن عبدالهادي: لا تقلقون اثنينكم والسلامه اللي كفلكم من يقسّم بالارزاق صوره تذكرني بيوم القيامه يارب عفوك يوم نشفات الارياق 6) الشاعر صالح السادة: اشكي عصافير الهوى يوم انا ضميان جفت ينابيع الوصل والمفارق جمْع رفرف جناحك حول عيني ولا تنهان يا طيرنا ما عاد يرويك غير الدمع 7) الشاعر فاضل سلمان : فقير لكن حبني مثل ما آنا ، غيري ما يملك مفاتيح السما بالفسق قدامنا الطير يروى غصب من مانا ، يسوق له رزقه اللي مكتفل بالرزق 8) الشاعر سعيد آل هطلاء : ريقي نشف وعيونك تشوف والموت يكتبني وانا اقرى لا تتركيني طالبك نوف في كل كبدٍ رطبه أجرى ! * مهرجان برزان الأدبي يقيم مجلس شعراء المحاورة القطري أمسية ادبية تتكون من قصائد نظم وشيلات ومحاورات ، وذلك يوم الخميس الموافق 15 / 11 / 2012 الساعة الثامنة مساء بمركز شباب برزان في أم صلال علي. للاستفسار الاتصال على هاتف : 44786665 ** حبيبي الشاعر / إياد المريسي حبيبي البارحه زلت لساني مالها داعي قسم بالله موقصدي اضيق خاطرك مني تنام البارحه وانته مخاصم صدري وذراعي! حبيبي كل شي فيني على شانك يعاتبني: ضلوعي ، قلبي العاشق ، حنيني ، اصعب اطباعي جنوني فيك ، ضحكاتي ، مداين لهفتي ، وشفني: على صدر الورق جالس عتبهم ينحر اسماعي: قدرت اتنام؟! ما صدق أمانه كيف؟! فهمني!! احس المشكله ما بيننا في داخلي اضلاعي كثر ما اشرح غلاك بخافقي منته مصدقني!! أحبك كثر ما تقسي علي بغربة اوضاعي احبك كثر ما اجمع لك حنيني لو تبعثرني أحبك .. عذري الاكبر .. وابي يا عمري اتراعي مثل ما تقول راضيني مع ان انت الـ مزعلني!! تعال الحين راضيني ابي تروي عطش قاعي ولهت اشرب من انفاسك دلع قولتْك رقدني أنا آسف..على الكلمه .. وزله ما لها داعي قسم بالله مو قصدي أحبك ، ها ! تسامحني؟! طيري ! الشاعر القدير / أحمد بن معلاي الكبيسي طيري غدا يم الديار البعيده فرخ الحرار اللي له القلب تواق حرٍ جنيته من مواكر حميده نسل الحرار البيض من طيب الاعراق عقب التعب قطع سبوقه وقيده واكفخ بجنحانه نوى بعد وفراق واوميت بالتلواح يمكن يعيده مير البلا طلعه بعيدٍ وسواق ناوي على جولٍ بكفه يصيده مكتوب في كفه للارواح خناق روح ضحى الاثنين بأيام عيده عيدٍ له العابد سعيدٍ ومشتاق عيد الفطر واليوم حولٍ يزيده الله الاحد حبه تمكن بالاعماق أن طال بعده قلت نفسي فقيده وان كان عَوّد طاب للقلب ما لاق احيه من قلبٍ تقطع وريده من زود حبي له ومن حر الأشواق إعلان فرقاك الشاعر / طلال حسين الحارثي ببدى قصيدي واعلن اليوم فرقاك تبكي وانا ابكي من بـلاوي سنيني خـلاص وانسى كل مـنهـو تـمـنـاك وحطك دوى جـرح الحياة الدفيني مادورك وارجـع واحـاتـي بطرياك خـلاص ما يـقـدر يـضمـك حـنينـي انسى حياتي وامحي اليوم ذكراك مير الـوكـاد الـدمـع بايـن بـعينـي بـتـذكـرك عند اللـقـا يوم لـقـيـاك واصد وامـشـي وابتعد عن سنيني بـقـول لك كلمة وماهي بـتخفـاك جـرحـك نزف جرحي ولا ترتجيني يعني على ماقول ماعاد أنا ابغاك ومـعـاد ابـغـى شـوفـتـك تحتويني شباك الوعد الشاعرة / اصيله السهيلي هو مداك الحين تسأل عني وين! لك ثلاث شهور ما تسأل ابد من شبعت غياب واشبعتك حنين جايني هالحين واحزانك بلد تدري اني مت متك من سنين! لا عدت احياك ولا اموتك بعد! منسكب هالجرح في ضلعي انين تصرخ ضلوعي ولا يسمع احد هاللعين القلبً بو نبض لعين ! ما يبيً فرقاك ذللني وجحدً ! وصرت اخبي الحزن خوفي لا يبين! واستر جروحيً واداريها عمد وكنت اشيلك كحل في عيني وازين! وكنت احطك عطر وامشي بك جسد وكنت بي شريان في عرق اليدين ! كل وريدٍ فيه يحيييني امد وكان حبك موت في روحي سجين! لو اجي بحياه يقتلني عمد يوه يا ذكراي يالحب الدفين ! مستحيل الصعب يالموت اللحد وين وعد الليل وميثاق السنين ! وين احبك ارض وجروحي بلد رد لي قلبي وخذ هالحاجتين ! دفتر احلامك وشباك الوعد وان بكى قلبك وعود بك حزين! قول يا مسكين انا هنته وبعد حالي نحل الشاعر / علي بن جابر الرميحي انا يا عرب حالي نحل وابتلاه البين وانا اللي من صروف الدهر معتَبر عبره .. عليك الله اكبر يازمان البلا والشين تضيّق علي وآقول جعل الفرج بكره عليك الله اكبر يافوادي صبرت سنين على الضيق والغربال والهم والحسره انا عزتي لي .. جات لي من طرف لادنين رفيقٍ لك الله ناكر الملح و العشره انا عزتي لي ما بَرت طعنة السكين وانا داريٍ باللي مبَدّيه من مَكره .. ا? ليتنا من قبل نقبل لهم .. مقفين على شان ? صدّوا نجافي و? نشره عسى ربي المعبود يعطف علي و يعين جعل خيرته فيما له النفس هي تكره عطني .. كرك ! الشاعر / علي عبيد الغيثاني يانور عطني كرك ما دام راسي خوّي ما يبعد عماس خوّي الراس غير الكرك يا كاسب المدح من كل حضري وبدوي ما أطيبك يالعامل الهندي ويا ما اندرك تطري علي كل ما ذيب الضلوع يعوي ويـصيـر بيني وبينـه عامل مشترك ولا صرت لانيب مجنون ولأني سوي ودخلت مع فكري المشغول في معترك وأصبحت كني من الجمر الحمر مكتوي والهم بارك على صدري ولا يحترك أخذت لي كاس مدري ويش هو محتوي تغترني أغلـب مقاديـره ولا تغترك واليا شربته يزيـن الجانب المعنوي وادعي لمن علمك به وأشكره وأشكرك وأخذ من الشعر شعر مرتب و فوضوي وآصف كل النوادر صف مثل الدرك شاعر ولي فالشعر سلطّة وبيتي قوي ويمكن من أبياتي العصماء يشيب شعرك