نرحّب بجميع محبي الشعر في صفحتهم ملفى القصيد ، ستجدون بإذن الله التنوّع في الطرح وحرصنا على رسمكم أجمل اللوحات الشعرية والتي تمنح الجمال لملفاكم .. ملفى القصيد. لمراسلة الصفحة: mohdalmanna3i@gmail.com تابعوا مجموعة ملفى القصيد على موقع facebook بادخال عبارة «ملفى القصيد» بمحرك البحث في الموقع * راعي الأوّله الشاعر / شبيب بن عرار النعيمي الامير اللي على شعبه يعايد مكرمه ولي عهده يعتمدها صدرت فالبث وصدور الجرايد وكل شرق وغرب فالعالم شهدها دام عزك ياقطر والمجد سايد شامخه عبر السنين وطول امدها القدايم فالثريا والجدايد واعدتها والتقتها في وعدها والبست من غالي اللبس الفرايد لين باها لبسها مرهف جسدها ياسلام الله سلامٍ مايحايد للامير مقدّم الدار وسندها كل ماقلنا حمد للمجد شايد كل قمة مجد ترسي لك وتدها كل ماقلنا حمد للعز زايد كل مزنة عز يرزم لك رعدها كل ماقلنا حمد للدار قايد تنتشي دولة قطر بك ياحمدها جيدها لاغلى الجواهر والقلايد وفي كنف حكمك تومِّي لك جعدها تعتزي بك فالرخا والاّ الشدايد وانت ترقى للعلا يدّك بيدها سجلت باسمك لكسب الصعب رايد انت راعي الاوله واللي بعدها والمزايا للشواميخ النوايد حبك لشعبك وشعبك قد حصدها والكرم والجود لك طبع وعوايد وين مايممت وبلادك بلدها دمها من دمك يمد المدايد كيف ينضب دام ابو مشعل مددها مثل دم اللي بعرش المجد نايد والي العهد وحجا الدار ورغدها من تميم الى تميم الاصل عايد والمكارم ماحصاها من رصدها كايد وطيبه على اهل الطيب كايد به نصاب الطايله يكمل عددها الكرم من جود يمناه متزايد سيلٍ يطم الهضاب الى صمدها والسياسه من فكر راسه تشايد صاغها راسه لشعبه واعتمدها صيرميٍ في سما الطولات صايد عدل ميل وفزعة النفس وسعدها والقبايل والعوايل والبدايد في قطر تقسم على وافي عهدها الولاء من بعد ربي والعقايد من حليب الام يربى به ولدها كل غالي دون حد الدار بايد ياحياة العز والاّ في لحدها * ساعي النور شاعرٌ جزلٌ دائما ما يدهشنا في إبداعاته الشعرية .. رغم اختفائه عن الساحة إلا أنّه يعود من خلال ملفى القصيد .. لا تحرمنا من تواصلك يا بو جبر. محمد جبر الرميحي يا ذوعة الورد مدري كفّه العطري ياطلّة الشمس مدري ضحكة سنونه ياساعي النور قبل النور لا يسري على جناح الهوى لآمس لي ظنونه قله عظيم الغلا من يشرق بفجري يبطي سواد الليالي يمحي لحونه إن حال لقياه لاصبره ولاصبري ذي سنّة الوقت لا عونه ولا مونه يلقى بصبح الشتا لو فارقه صدري قلبٍ يكف الدمع من خادر جفونه والقى بليل الجفا في عرسه الجبري ناسٍ تهل الثرى قبري ويبكونه * ثقافات العرب يكتب على القاف الصعب ، ويسجل إسمه في الساحة الشعرية بـ (ماي الذهب) محمد ابن شبعان شاعر مفوه بالشعر و أكتب على القاف الصعب أجمّل أبيات القصايد كلها و أعدها وإن ماعجبتني فكرتي أسلب من الواقع سلب نفسي تسولني على الابيات وآخذ حدها والشاعر اللي قد تهقوى ودك أنه ماقرب يبطي مع بيوته وخله يلتهي في عدها ومادامني شاعر وأسمي يكتب بماي الذهب فلا همني بعض الاوادم لو تبين صدها واللي يقول أن المراجل ماتسبب لي تعب يحاول يخفّي علومه لين بيح سدها والماضي اللي قد تسطر بين صفحات الكتب هو الذي بين لنا هزل الامور وجدها الشعر في الماضي يعبر عن ثقافات العرب واليوم مانسمع سوى لبى العيون وخدها ياهل العقول الواعيه بالشعر ولا بالأدب اليا متى والشاعر أبياته عن اللي ودها والجرح دامه في خفوقي من شقى الحظ التهب خله مع سود الليالي لين ياتي ردها الصيف حار ومايجي في موسمه غير الرطب خلك مثل صبر النخيل يكدها من كدها * دقة باب ? الشاعرة / أنثى جموح بعد التحية ... على غير العادة ، ألتقي بكم مع (شطر قهوة) ، لنرتشف معنا نكهة التغيير ... قبل البدء : بودّي أن أسكن الفرح فنجاناً دافئاً فقط ... لكني أجدني مرغمة على الإعتراف لـ «الستار» بالغرام الذي وقعت به مع الـ «خوووف» ... فليكن ! مدخل : الخوف : لا غطّى ستار الليل في وضْح النهار ، وْ : ما دريت إنه ستار الليل !! معبر : آساوم احروفي واصبّ الشوق في كوب الشعر واغلي شطر قهوة غلاه بـ ليليَ الواله (ندا) واسكب بعض مرّ المسافات بـْ أحاديب الصدر والعجز يسكنّي : رحيل ايشمّته فيني عدا ما جيت له كلي ولا بعضي حضر رشة عطر ما بينه وْ بين القميص اللي سكن فيه بـْ هدا فقدانه الملبوس في حفلة أهازيجي : سهر لونه كما ظلي أو إنْ ظلّي كما لونه غدى والروح من بُعد السما تتأرجح بـْ قطرة مطر رعد الوجع بارق على سطحٍ تبخّر له سُدى يتمدد افراش الجراح بـْ شهقة العاشق فجر وبْـ عمر من حسّ بـْ فجر عشقه تحدّد له مدى كل ما حِلَم بابي : يفزّ القفل ويْلوح الكسر ويْضيع مفتاح الصبر لجل إن عيني له فدا بس اليقين إن الفدا في يوم مكسوب الصبر وإن القفل لما انكسر في باب حلمي له صدى واللي يخاف امن الستار اللي ورد باوّل سطر لابُدّ يِعَرْف إنه سِتَار وْ صبحه الواضح بدا وإن الندا لمّا غِلِي في قهوتي صوبه شطر لابُد يجي ردّ الوسم من قبل يخطفني ردى مخرج : تلهث على كم خطوه .. بالورب ! والدرب؟ ياما الدرب خذ له غفوه ....!! يا قلب : صب لك شطر من قهوه صب لك شطر من قهوه صب لك شطر من قهوه d88t_bab@hotmail.com ?