نرحّب بجميع محبي الشعر في صفحتهم ملفى القصيد، ستجدون بإذن الله التنوّع في الطرح وحرصنا على رسمكم أجمل اللوحات الشعرية والتي تمنح الجمال لملفاكم.. ملفى القصيد. لمراسلة الصفحة: mohdalmanna3i@gmail.com تابعوا مجموعة ملفى القصيد على موقع facebook بادخال عبارة «ملفى القصيد» بمحرك البحث في الموقع ، وعلى تويتر : :malfaelge9eed@ * شهر الفضيلة الشاعر / سامر بن هزاع روض القصايد دب فيها خيالي وأطلق عنانه من غرسته هنيّه فاحت نسايم زاكيه من شمالي فيها بشاير من عبقها عليّه عقب الفكر أقبل عليه سؤالي وش البشاره في حياةٍ شقيّه ؟ صدفه عيوني ناظرت بالعلالي منظر طبيعي لامعٍ بالعشيّه بعد المفارق من شهورٍ طوالي اقبل علينا من ضوانا بضيّه السالفه بيّن ظهور الهلالي وعم الفرح في داخلي من محيّه نوره تغلغل بين ربعٍ واهالي لامن لفى بالمغفره والهنيّه شهر الفضيله في عروقي جرالي يروي ضمايه من سقاني بريّه شهر الفضيله في قيام الليالي يغفر ذنوبٍ من دروب الخطيّه شهر الفضيله في زماني غدالي أجمل عطايا من مليك البريّه اعطى اليتامى من مداخيل مالي دام الأيادي في رخاء وسخيّه ساعد فقيرٍ لا عطيته ريالي تشرح خفوقه من مواجيع حيّه ‏افرح ليا شحت موارد حلالي في بذل أموالي بشكر العطيّه صوت المآذن بالمسامع سرالي يوم الخطاوي للمساجد سعيّه فيه المئاسي زايله من قبالي ‏في سجدتي بْكل خشوع وْرضيّه بوصيك يا مسلم بعشرن توالي ترضي بهن ربك وترضي نبيّه * غصون الوصل الشاعر: طارق الهنداس مـآلت [غصوُن آلوصل] فِي جَوُف صَدري وُآمــا رحِيــق الوُصل : سَآحَــت قطَـاعه ( نتـوآعَــد آحيـانــا ) : ولا آشـوُف قَــدري مَآنَملك ( آحسَآس الوُصَل ) وُ استـطَاعه قَـلــي [ عَلـيـك الله ] تــخـلـيــنـي أدري هَـــل مِـن سـبَــآيب هـ القطاعه وُ دَاعــه مَليــت آنَـآ [ يَـجرح ] مِن آلــوصل حـدري بحَـلفــــك بَــــ الله ( سمعـاً وُ طَـــآعـــه) مَآتخَــاف ربّـك سَـآل ( دَمّـي ) يـ هَــدري يَآ خــوُك جَــرحـك جَــاب لِــي هَـ الآشَاعه إبَيك ( تَبعـدني ) مِــــنْ آلطَــــعن بــدري عشآن مَآدعِــي بــ الــجَـفَـا لوُ لــ سَــاعـه جَرحكَ ورَبّ آلبيــت بَــاين بَـ ( صَــدري) آجــرحَ وُلآ تزخـرف جَــروحــكَ بـ شَـاعه لآ صـــرتَ عَـــآيفني وُ هَـ الــناس تَــدري رجَـال وَ عيوبَي .. ( عـــيوُب الشجَاعه ) * عصفورتي الشاعرة: بسمة عصفورتي و اللي خلقنا مساكين ما يعرفون العمْر في شكل ثاني هم يحسبونه مال ، سلطة ، و تمكين ما فيه ( نبض ) يعيش بين المحاني بستان عمر و ما يعرْف الرياحين !! لا مر به ريح الفرَح و الاماني أحرار لكن في الحقيقة مساجين !! بين الهموم وبين ذيك المباني عصفورتي شوفي العمر فـ البسيطين شوفي الأماني كيف تُنبت أغاني هُم مجتمع منسي و مفلس و مسكين من كل شي الا هموم المواني يحيك من طول انتظاره فساتين و تنبت على طارف لسانه ( نساني ) علـّق على صدر السما منْه كفين يدعو الهه يا إلاهي عشاني لا صرت في قبري و بين الملاكين ثبتني لامنّه لساني عصاني يواجه الدنيا ببسمة رضا لين كنه يقول : الحزن ما يوم جاني لو كثْرت همومه ولو اثقله دين و لو كان من جور البطالة يعاني يبقى ( ثمين ) يعيش بين الرخيصين و يبقى شعور انسان له عمر ثاني * الحق المبين الشاعر: وليد العبد الله يا واقع الأمة ويا مرّ السنين الخانعة لكل الضروف الموجعه كل ما تقدّم بك عُمر الله المعين كنّك عجوزٍ وسْط صحراء مضيّعه ما بين دفنة روح وأرواح الدفين المشكلة تشكي وشكواها معه يا رحمة الله أزرعي فينا السمين اللي ليا ضاقت حصدنا مزرعه !يا مجتمعنا آخر المشوار وين؟ وش شو له نبدّل وجيه وأقنعه أرخصنا حاضرنا وماضينا ثمين كلّن ورى الدنيا ولحدن يردعه من حالنا الحالي يعاتبنا الحنين كانت مراجلنا تفزّ امجمعه واليوم ضعنا في الوضع دنيا ودين لا نملك العدة ولا نص امتعه البارحة بين الحنايا مستكين شيٍّ ولا أدري أتركه ولا أنزعه يا حيرتي يا وشوشة فكري اللعين يا جفني الشاكي بتحدّر مدمعه يا زعزعة وقتي متى وقته يحين يا وقتي الحاني عسى ما تزعزعه وأنا على هالحالة يرهبني رنين من عقب ما صارت دروبي مفجعه الشام يصرخ صرخة الطفل الضنين وأقصى العرب يسمع ويحقر مسمعه من هو يلبي صرخة الطفل الحزين من هو يقوم وينتفض من مخدعه لا مرجلة لا قبيلة لا مجاهدين ما غير نخنق صمتنا من منفعه بأقولها بالمختصر يا فاهمين من هاهُنا واللي زعل رحب وسعه أول مشاوير العتب في حاجتين الإبتعاد ودرب رب إنضيعه وآخر سموم إذنوبنا يا مذنبين نسكت عن الحق المبين ونبلعه نرضى بواقع كل أبوه بشغلتين ذل وحقارة وأضربوها فـأربعه * يا الله يا الله الشاعر: محمد بن شرهان يـــاللـــه ياللــه يامعطي بــلا مــنـه تعطيني العفو في شهرك ومرضاتك ارهقـنـي الذنــب ياغفار يــوم إنــه تـقـصـير نفسي يـبـيـن في عباداتك والخافق اللـي من ذنوب العمر كنه غصنٍ ذبل من شموسٍ في سمواتك آرحـم ضعيفٍ تبع منهجك والـسنــه أكبر طموحه دخــولـه وسط جناتك وآرحـم فـقيـرِ يداري الذنب ويـكـنه مـخـافتك كــل مـاقرب لـحــرماتك إلـيـا توّحـد بـمـجلاسـه زعــج ونــه من كبر ذنــبــه وتقصيره مع ذاتــك وزمــام نفسه بشهر صيامـه يــعـنـه ولاخير باللـي لحرمة خالقه هــاتــك ياللــه ياللـــه لايقفي الشهر عــنــه إلا بعفوك وصفحك ثـمّ مــرضــاتك * يا الله الفزعة الشاعر : طالب محمد البطين كثرت هواجيس بالي يالله الفزعه افزع لعبدٍ سنينه سارت اخصامه قامت همومي تهاجمني ومجتمعه ابني احلومي لاكن لايام هدامه تكشف خفايا نفوسٍ مابها نفعه وانا خوافي ضميري ماخذ اوسامه ياراكض بدنيتك ماهيب منتبعه كم واحدٍ قبلكم قد ماتت احلامه اصنع لنفسك علومٍ ترفع السمعه لاتتبع ابليس ايلين اتنفذ احكامه ارجع لربك وخل النفس من دفعه في خدمة الدين خل السير درهامه وحاول النفس تطلب رحمته طمعه قدام يرمي عليك الموت بسهامه * الشاعر : تركي الشمراني يا ما حلـى شهـر ارمضان ولياليه حـل الكريـم وبـاب فضلـه تشرّع ( كلٍ يبـدّي فعل خيـره لـ بـاريه ) ولا شاف له مسكين حنّ و تبرّع يحـس بـ شعوره وش اللـي يعانيه طول السنه كم من وجع قد تجرّع آلله ؛ يا هـو يكسف القلب ما فيه و لا كـنّ صـدره من همومه تمرّع أقــول : سبحـانـه ، تعظّـم تـعاليه ربّـي ... تِغَفـر اذنـوب عبـدٍ تسرّع و تحسن ختامه و إن تخيّر بـ تاليه مؤمـن : بـ إيمانـه و فعلـه / تدرّع دنيا فنيّـه .. و العمر وين حاليه ؟ يا الله ، عنهـا ... جعلنـي آتورّع