نرحّب بجميع محبي الشعر في صفحتهم ملفى القصيد، ستجدون بإذن الله التنوّع في الطرح وحرصنا على رسمكم أجمل اللوحات الشعرية والتي تمنح الجمال لملفاكم.. ملفى القصيد. لمراسلة الصفحة: mohdalmanna3i@gmail.com تابعوا مجموعة ملفى القصيد على موقع facebook بادخال عبارة «ملفى القصيد» بمحرك البحث في الموقع ، وعلى twitter:
صقور الجو
الشاعر / محمد بن فطيس

من لا يضر إلى لزم الأمر ماسر
وحنا صبرنا لين شفنا الصبر طال
لا والله الا ندحر الضد ونضر
وإن رادها الله ندفع ونقصره جال
عدونا في حلم قاداتنا اغتر
مايدري انه تحت دربيل ختال
وقاداتنا ماقصروا والصبر مر
الين ظل الأمن عن دارنا مال
شيوخنا في السلم ببشوت وغتر
وفي الحرب دون الشعب رجلي وخيال
والدين خط دونه الموت الأحمر
انذود من دونه شيابين وعيال
حنا صقور الجو وسباع في البر
وبالعزم نشرب غبه ونطحن جبال
دون الوطن مانكره اليوم الاقشر
وخيولنا لا شافت الخصم تختال
وتبحث يديها القاع عرض وتنفر
وذيولها فوق العراقيب شلال
ورجالنا غاراتها كلها كر
يكرم علينا الفر في كل الأحوال
إما نجي هلنا بنصر مؤزر
ولا نموت بعزنا موتة أبطال
كم من عقيد من نحر جيشنا فر
وكانه قبيض اعقاله لرجله عقال
وكانه صمل عود على ربعه يجر
رده حصانه يسحب كراعه اجفال
ياشيوخنا حنا على الخير والشر
دون الخليج ودونكم جيش ورجال
ياشيوخنا وكبارنا والله اكبر
منا لكن فوق الولى حب واجلال

إهداء إلى الأحوازي أحمد سبهان
الشاعر / بطي الحبابي

الشكر للي جمعهم ماينهزم
ماينهزم واصفوفهم متراصفه
ابو فهد بدى بـ عاصفْة الحزم
و ( أحمد ) رفع صوته لحزم العاصفة
ذنبه شجاع وصامل وعزمه عزم
مالان لو تمشي عليه الراصفه
سنّي وبلباس العروبة ملتزم
على ....... مثل ضرب القاصفة
مايقصر الشامخ ولا يشْمخ قزم
وكلٍّ فعوله خير وصفٍ ياصفه
الحر بحزام الكرامة يحتزم
وكل الحرار تشجّعه وتْناصفه


نعم .. صادق

الشاعر / عبدالرحمن الحمادي

انا المسكين في حبك وصدقني
انا واعوذ منها هالـ(ـأنا) بمزوح
نعم صادق نعم ، هذا خطا مني
يطيح القلب لامنه غدا مشفوح
مدام انك نويت اتغيب خبرني
عشان الم حاجاتي قبل لـ تروح
اشيل القلب والذكرى ولا مني
بغيت اروح قول: مسامحك مسموح
أَجّمـع كــل ابياتـي وأَجمّعني
وابـي آبوح لكن ماقدرت آبوح !!
عشان اكتب شطر واقول واغني
الوم البوح مايظهر بدون جروح !!
واعبر بالقصيد اللي حكا عني
ولولا دفتري هذا فأنا مفضوخ
اظن اني واظن اني واظن اني
وبكتم كل مافيني ولا بانوح
ياحزني دام هالضكات تخذلني
تكرم لاغدا بابك علي مفتوح
اقول الوقت ماشال الحمل مني
اثاري الناس ماتعطي بلا مصلوح


على هاوية جرح
الشاعر / عبدالعزيز العميري
واذكر إني في التعب
سافرت لك
لما الضلوع العوج طاحت
والزمن فيها اسْـتدار
ومابقى لـْـضعفي خليل
لاشجَر لا ظل
ولا حتى جدار
واسْتريح
وْمن بعيد
ألمحك
بآخر شفا / من رحلة الفرقا
واطيح!
اندفن تحت الغياب
وين أولـِّي
والجهات سْجون ذكرى
والسما / جْناح الاماني
للضعيف
اللي بلا سقف
وذرى
اللي زرع كفه /صلاه
وكلما ضاقت دروبه
صاح ربَّاه !
وماعلى الذكرى ملام
اعتذر
غلـَّـفـْت لك ماي الندم
واللي تبقى من عيوني
واسألك
حبيبتي :
العمْـر وش هو؟!
غير طرفة رمْش تفصل
بين ميلادي وموتي
ارجعي قبل المغيب
ومرجحي حلمي إلى
آخر بياض
وان طواني الليل غني للنجوم
ودسي في وجهي عيونك
انفضي غْبار الغياب
قبل مـا اصحى
والنهار يْمرر الشمْس بْجبيني
وادري إنَّي
كنت احلم
والعطر
ما كان عطرك
والاثاث اللي ترتـَّـب
رد َّ من ثاني سعال
طارت الايام مني
الزمن ما هو بيدَّي
وانتي مثل العمْر
ط
ر
ت
ي !