نرحّب بجميع محبي الشعر في صفحتهم ملفى القصيد، ستجدون بإذن الله التنوّع في الطرح وحرصنا على رسمكم أجمل اللوحات الشعرية والتي تمنح الجمال لملفاكم.. ملفى القصيد. لمراسلة الصفحة: mohdalmanna3i@gmail.com تابعوا مجموعة ملفى القصيد على موقع facebook بادخال عبارة «ملفى القصيد» بمحرك البحث في الموقع ، وعلى twitter: malfaelge9eed@ * صفحات الآهات ! الشاعر / عايض بن غيده خليه يملا منْك صفحات الآهات الين تنفد من شعوره حروفه لو يوصف أشكال الهوى عشر مرات عن رسمتي للشوق تقصر وصوفه للشعر أداه وللرسومات أدوات وأنا كفرت بريشته قبل أشوفه في صفحتي بحرٍ ولا له نهايات حتى سفينة نوح تعجز تطوفه أعطاني الله في حياتي كرامات وأكبر فضايلها كرامة ضيوفه وعطاني الله فالزمان اختبارات نجحت واجهود الكرام امخلوفه وفضّلت لي دانه على عشر دانات منها سجد قلبي بحزنه وخوفه حتى احتوت كل الصور والعبارات وخذت مساحة ما بقى من رفوفه فيها الهنا فيها الفرح والمسرات فيها سهر عينه وفركة كفوفه خوفه عليها من ثلاث اتجاهات والرابعه جنّب بنفسٍ عزوفه حتى غدت كابوس في بعض الأوقات من كثر ما صارت تغيّر ظروفه فالناس فارق والجمال اختلافات ومتغيرات احصا الجمال امعروفه إلاّ بعَض الأرقام له عشْر خانات إذا دخل جدول يلخبط صفوفه وكم ترفةٍ فيها من الريم شارات يذمّها اللي ما توافق شفوفه الأذواق لوّنها سوى كان مأسات كان الجميله كل يوم امخطوفه لكن ربك حط للعبد نظرات شيٍ يزيّن له وشيٍ يعوفه في جنة النسيان نعمه وراحات تطفي كبودٍ باللهيب امحفوفه ولولا التذكر كان ما عاش من مات على النقيض الجور ولا المروفه اللي يوزع كل صبح ابتسامات يجوز ذا تعبير عن حر جوفه ماهوب شرط تصح كل الدلالات طلة سحاب الصيف معنى نكوفة * الجــود الشاعر / مساعد بن جبران ياللي تنشّـدني تبا علم مفرود تقول بـ الله عن فعايلك فـدنا بعطيك علمٍ بين الاجواد مشهود محمي من الـشكات ما ينتقدنا حنا نحب الجود ونصاحب الجود وان شحّت الايام بالجود جدنا ما نشتكي للناس والله موجود عليه في كل الأمور اعتمدنا وخوينا محـشوم عن كل منقود لو زل نرفـا زلـته مـا نـشدنا نقصر له الجانب على الهون والكود وفـي لازمـه بالواجبات اجتهدنا وان صار قدْم القوم ملحٍ وبارود بارواحـنا دونه عن الـموت ذدنا والـجار حـقه فايقٍ كـل مقصود عـزيز مُـكْرم وان بغـانا وجدنا نرفاه عن كلمة هبيلٍ ومقرود زعـله يزعلنا وسعـده سعدنا وعدوّنا يصبح عـلى الكـبـد ملهود وان زاد بعـناده من الغـيـظ زدنا واهل عدل بايّامنا البيض والسـود نقدم ولا نخطي ولا احدٍ نـقـدنا عاداتنا مـن عصر عـادٍ وثـامود الطـيـب والمعـروف مـن فعل يدنا ما نثني على النقص نتعب على الزود ولاهل الفعـول الطـيبة ما جحدنا مادامت الـدنيا لـسـيد ومـسـيود وان مازرعـنا للـثناء ماحصـدنا المرجله دربٍ على اللاش مسدود وحنا علاها بالفـضيلة وردنا فينا الوفاء وهبة من الورع للعـود والي لفانا الضـيـف طاب وحمـدنا والناس فيهـم طيب الساس محمود ماهو بحنا اهـل المراجل وحدنا كم غيرنا رجال له فعل وزنود لا تحسـب انا فـوق الاجواد سدنا رجالٍ لها شيمه وقيمـه ومجهـود نـسمع ومما يفعلون اسـتفتدنا تـسـيدم والهـُم مواثيق وعهود مااقول عنهم بـالفعول انفردنا ياسامع الأمثال ما فالردى فود اهل الردى ياخـذهـم الله من ادنا الدرب لهل العـرف واضح ومجرود ومن جنّب الشيمات عـنه ابتعـدنا والجود عند اهله ولاهو بمفـقود وغـير العـلوم الطـيـبة ما قـصـدنا والناس عاشت عيشة سهود ومهـود والله يحفظـنا ويحفـظ بلدنا هـذي وهايب ربنا خيـر معـبود سبحانه الـخـلاق محـصـي عـددنا * مهرجان الشارقة للشعر الشعبي انطلق بالأمس مهرجان الشارقة للشعر الشعبي بمشاركة شعراء وإعلاميين وباحثين من دول الخليج العربي وتونس والأردن والعراق ، وبرعاية كريمة من صاحب السمو الشيخ الدكتور سلطان بن محمد القاسمي حاكم الشارقة الذي يلقي اهتماما ورعاية خاصة منذ ثلاثة عقود بالشعر الشعبي ويشارك به هذه السنة العديد من الشعراء والإعلاميين من قطر كالشاعر والإعلامي راضي الهاجري ، والشاعرة مي الحبابي ، والشاعر والإعلامي سعود بن شافي ، و محمد راشد المناعي. و نعدكم بتغطية مفصّلة للمهرجان في العدد القادم بإذن الله ، علمًا أن المهرجان مستمر حتى الثامن من شهر فبراير الحالي. * شباك الوعد الشاعرة / أصيلة السهيلي هو مداك الحين تسأل عني وين لك ثلاث شهور ما تسأل أبد من شبعت غياب واشبعتك حنين جايني هالحين واحزانك بلد تدري اني مت منك من سنين لا عدِت احياك ولا اموتك بعد منسكب هالجرح في ضلعي انين تصرخ ضلوعي ولا يسمع أحد هاللعين القلب بو نبض لعين ما يبي فرقاك ذللني وجحد وصرت اخبي الحزن خوفي لا يبين واستر جروحي واداريها عمد وكنت اشيلك كحل في عيني وازين وكنت احطك عطر وامشي بك جسد وكنت بي شريان في عرق اليدين كل وريدٍ فيه يحييني امد وكان حبك موت في روحي سجين لو أجي بحياه يقتلني عمد يووه يا ذكراي يالحب الدفين مستحيل الصعب يالموت اللحد وين وعد الليل وميثاق السنين وين احبك ارض وجروحي بلد رد لي قلبي وخذ هالحاجتين دفتر أحلامك وشباك الوعد وان بكى قلبك وعوّد بك حزين قول يا مسكين انا هنته وبعد * معاني .. العشاق ! الشاعر / حمد البريدي اجرح اللي يعشقك ويموت فيك والجروح الأوليه.. انسها والمس آخر جرح حطيته بيديك الجروح يطيب منك.. لمسها تدري ليه اشتاق لك والجأ إليك صبري وشوقي ذبحني حبسها شوفتك عقب البطا للي يبيك تخجل الدنيا.. وتكسف شمسها والله ان مالك وسط قلبي شريك يا مقابيل السعاده.. وأمسها الكرز منبع جذروه.. وجنتيك بين وردات الخدود وغرسها كل ما عضت سنونك شفتيك النحل ينتج عسل من غمسها الله يخليك ذخر لوالديك الحواس الخمس عندك خمسها لمسك وشوفك وريح العطر فيك وطعم حبك.. والشفاه وهمسها والنجوم اللي تحاول تعتليك تشتكي من نور وجهك.. طمسها يا مناي الله يرضى لي عليك شوفتك تجلي الحظوظ ونحسها حتى لو تزعل.. وتعقد حاجبيك حافظ عيونك.. وحافظ درسها المعاني مثل ما هي تحتويك لكن احيانا تناقض نفسها ما أحبك ما أودك ما أبيك في فم العشاق تعني عكسها