«الجواز مش شبكة.. والشبكة مش بس دبلتين.. لكن الجواز مسؤولية كبيرة يقتسمها الزوجان.. مش هنقول إن مفيش تكاليف مادية كبيرة.. وإنها تسببت في زيادة نسبة العنوسة.. لكن مش هأقول غير مش معايا غير دبلتين: تتجوزيني؟». تلك المقدمة تمثل خلاصة فكرة جروب «مش معايا غير دبلتين تتجوزينى.. الحملة القومية لإلغاء الشبكة»، الذي أنشأته مجموعة من الشباب على موقع التواصل الاجتماعي «فيس بوك» لإلغاء «الشبكة»، وذلك بهدف تقليل تكاليف الزواج. وطالب الشباب بتسهيل الزواج بدون تعقيدات شكلية كالـ «الشبكة، والتكاليف الباهظة في الفرح»، ودعوا إلى أن تذهب التكاليف الباهظة لشراء الاحتياجات الأساسية للزوجين في «عش الزوجية». وقال مسؤول الصفحة -التي يتزايد عدد المعجبين بها بشكل ملحوظ، حيث يقارب عددهم 28 ألف «فيسبوكي» خلال أيام قليلة-: «يجب أن تكون الشبكة دبلتين وتوينز وخاتم أو دبلتين ومحبس.. ولو مفيش يبقى فضة.. أو تدخل على الصيني». ورغم أن الحملة لاقت إقبالا كبيرا من الشباب، فإن بعضهم عارض الفكرة. وقالت أميرة يوسف: «في الحقيقة الرجل لا يدفع شيئا في الجواز، الشقة كدة كدة باسمه، والمهر إن دفعه بياخده تاني وكمان العفش في بيته، أما المؤخر.. لا، أحسن المأذون هياخد فلوس». وقالت كريمة محمد: «أما الفستان فالعريس يقولك قومي بتأجيره، ووفري.. والشبكة الحاجة الوحيدة اللي قدمها ليها، ممكن يبيعها في الزنقة.. كمان عاوزين تلغوها». أما سومة الإعلامية فقالت: «هي ممكن تكون دبلتين وخاتم، إنما فضة دي بصراحة صعبة أووووي.. ومش هتتلغي كلها.. ولكن ممكن يكتفوا بالدبلتين والخاتم في ظل الظروف الصعبة». ودفاعا عن الحملة وفي ظل ارتفاع أسعار الذهب قالت سومة «ممكن نتنازل بس التنازل هيكون قصاد إنه إنسان محترم ويراعي ربنا فينا، وممكن ساعتها نستغنى عن الشبكة». ورد أحمد شهاب وقال «هو دا الكلام يا بنات، فيه أمل إن الواحد يتجوز أهو.. وعظيم بيمين اللي عمل الصفحة دي برنس.. والله الحكاية ما بقتش جواز دي بقت بيع وشراء.. تحس إنك رايح تشتري عربية مش تتجوز.. مهر مش عارف بكام ألف جنيه.. وشبكة مش عارف بكام.. وشقة مش عارف بكام... أنا لو أبو تريكة مش هعرف أجيب كل ده». فيما قالت إنجي السيد: «بالنسبة للناس اللي عايزة تلغي الصيني.. طيب هناكل ونأكل الناس في إيه.. في الأطباق البلاستيك والملامين؟ وبعدين حرام بقي إنتو طالبين إلغاء الشبكة بس، وأنا بدأت ألاحظ إلغاء حاجات كتير حتى الدبلتين! يا حسرة قلبك يا ماما.. ودلوقتي مبقاش فيه مهر لأن العريس والعروسة بقو يتقاسمو تجهيز الشقة». أما أحمد سو فقال «الشبكة تدمر الصحة وتسبب الوفاة.. وبترفع الضغط وتجيب سكر.. حافظي على عريسك يا بنية». وقالت مها «تعملي إيه لو حصل معاكي الموقف ده.. جالك عريس.. ووافقتي بالدبلتين.. واتحدد ميعاد الفرح.. ونتفق على الجهاز والأدوات الكهربائية.. وتيجي أم العريس وتقدم الميعاد.. وتكوني مش جاهزة.. وتقولك أنا هاجيبلك كل حاجة ولا تشيلي هم، وتكوني في غاية الخجل.. وتخرج معاكي تختار لك الجهاز.. وتكوني من كثرة الخجل مش قادرة تختاري لأنك متصورة إنها اللي هتدفع.. وفي النهاية حماتك تقولك.. متنسيش تجيبي ورق يثبت إنك موظفة ويحدد راتبك علشان تسددي قسط الجهاز».