نرحّب بجميع محبي الشعر في صفحتهم ملفى القصيد، ستجدون بإذن الله التنوّع في الطرح وحرصنا على رسمكم أجمل اللوحات الشعرية والتي تمنح الجمال لملفاكم.. ملفى القصيد. لمراسلة الصفحة: mohdalmanna3i@gmail.com تابعوا مجموعة ملفى القصيد على موقع facebook بادخال عبارة «ملفى القصيد» بمحرك البحث في الموقع ، وعلى تويتر : :malfaelge9eed@ * مخاليق وأجناس من دار النشامى ، أهدانا الشاعر الأردني حمزة الهاشمي قصيدة جميلة خص بها ملفى القصيد الشاعر / الشريف حمزة الهاشمي يا صاحبي لا ضاق صدرك من الناس واتحس هالدنيا تجي عكس ودك .. ازبن لرب الناس يا طيب الساس وارفع يدينك للذي ما يردك .. عشنا و جربنا مخاليق واجناس يا قل منهم في لزومك يسدك .. بعض البشر يا خوك وسواس خناس لا هو يجيك بخير لا هو يهدك .. و البعض يشكي لك مقادير و اتعاس وان جيت تشكي له همومك يصدك .. هو صح فيه الخير في غالب الناس لاكن زمانك بيح اليوم سدك .. جمع عليك اشكال ما ترفع الراس يعني على ما قيل ما هيب قدك .. حدك عليها ساس واخلاق واحساس يعني مشيت بسلم خالك و جدك .. لاكن ذهب معدنك ما يقبل انحاس الوحده ابرك من رفاقه تهدك .. دور على اللي فيه رفعه و نوماس وان طحت قبل اتطيح دايم بحدك .. الكيف عنده بن أشقر و محماس يعني خوي جالك على كيف ودك .. ذاك الذي لا جيت ضايق و محتاس اطلب و غير القول لا لا يردك .. وان ما لقيته لا تدور على الناس يا قل منهم فالشدايد يسدك .. * أموت فيك وعليك الشاعر / خليل الشبرمي يامن دهتني عيونك واحتوتني يديك الله يسامحْك كيف تقول ماذا دهاك ماتدري اني متيّم بك وكلي لديك مملوك مأسور مسبي مستهام بهواك أموت كلي معك .. واموت فيك وعليك واغليك لكن عسى الله مايبيّن غلاك واحنّ اليك .. وعليك احنّ من والديك ومن لهفتي عين قدّامك وعينٍ وراك أشتاق لك واشتكي لك منك واشكيك اليك كلك ملكني .. وكلك في عيوني ملاك جادلك جيدك جبينك خنجرك حاجبيك اسمك سماتك سمّوك سِسْتِمِك مستواك جوريْك جمرك لجينك عسجدك وجنتيك ذرابتِك رقّتِك روعة حضورك بهاك وجهك وهج مبسمِك بسمَتْك غمّازتيك براءتك .. خالك اللي لاذ بايسر شفاك سِجِنّجِلِك جلنارك نرجسِك كركديك كاديك مسكك نسيمك شمس صبحك مساك سلهام عينك .. نَعَس طرفك .. حَور مقلتيك بوهَتْك ملحك حلاتك خف دمك حياك ما اعرف اداري ولا اهدّي ولا امسك بريك لاجيت اجي كلي .. وكلي عساني فداك أقدّم الروح كاش .. وباقي العمر شيك باسمك مصدّق ولا يصرف لحيٍ سواك يامن دهتني عيونك واحتوتني يديك الله يسامِحْك كانك قلت ماذا دهاك * مساجلة شعرية دارت هذه المساجلة بين الشاعرين الأخوين المبدعين عايض و حامد بن غيدة .. حامد بن غيدة بعد ما هب البراد و شفت نجم سهيل بادي مرحبا في مرحبا لا شك تستاهل دبلها الرسالة يا رسول الحق و الصوت المنادي يآجب انك يوم تنقلها ، تحل رموز أهلها عايض بن غيدة بعد ما هب البراد وشفت للامثال حادي البقا فيها بقا من ناشد القمه وصلها طرفة ابن العبد شل رسالته رايح وغادي لين جابت خاتمة من شافها يكره مثلها حامد بن غيدة يا قيادي ليه في تال الزمن صرت انقيادي كبتت يا رأس كرت و في يدك شفنا حللها طرفة ابن العبد مسلم مير في صف الإعادي ظلها في ظل من ظله تسبب في ضللها عايض بن غيدة القيادي يوم شاف غليص فالدرب المقادي اعتبر واخلص وخلّى تمرها يزهى نخلها طرفة ابن العبد شوفه بين شبكه والقيادي لا قدر يبني سهول ولا قدر يهدم جبلها حامد بن غيدة كنت أحسب انك تجيب العلم يا راعي الشدادي و اثرك اللي ساق ساقه لين زلزل من زللها طرفة ابن العبد حرٍ بين ضلع و بين وادي فارسٍ يوم العرب تِفرَس على سبة خجلها عايض بن غيدة والله اني عند ما تبغيه مايكثر رقادي مير لا تغريك نفسٍ وردها يشبه بصلها خل طرفه في مصيره وافهم افهم في مرادي الرجال توصل المجرم حدودٍ ما دهلها حامد بن غيدة ابخص أنواع الرجال و خابر أنواع الدهادي و اتحلى في حلاياها قبل لا أكشف حيلها ديرتة ديرة سدود و ما معه رايٍ سدادي و أن عرفته فاطرح علومه على رجلٍ جهلها عايض بن غيدة بارك الله فيك لاجاك الهجوم الانفرادي تشتم اللاعب بعدما ضاعت الفرصه واملها لو دخل شبكك هدف ما عاد لك نيه تمادي احمد الله يوم سلمت قافلة صخر وجملها * سكة الفرقى الشاعر / ناعم العنزي وقفت فسكة الفرقى على دربي كذا شهريـن معايه شنطة الذكرى بها حبري مع اوراقـي بعد ماطاحت العبره وقلبي فاقد المقفين بكلم عقلي الباطـن يقفـل باقـي اعماقـي كذا يازينة المبسم على بابك تقـل مسكيـن احذف من ورى سورك تحياتي مع اشواقـي وباصبر والامل عندي ترى مبني على شيين يحن قليبك القاسي على الذكـرى وخفاقـي وضحكه ساكنه بالي بها كثر الدلـع والليـن تردد في صدى روحي على غربي ومشراقي وغصني بعد عصفورك يغردبه غراب البين يحن الغصن لطيورك ويشكي لوعة افراقي يصوم الخافق لعينك عن عيون البني يازين ويفتح سوق شرياني عليك ويعلن اغلاقي تهز الصمت في ليلي طبول فراق هزٍ شين وانا لو كنت ماحبك بودع حبك الباقي وبرحل والامل عندي ترى مبني على الثنتين سقا الله خطوةٍ كانت عليه تسبـق الساقـي * آخر نداء الشاعر / جابر الدحابيب فـ يوم ممطر كنها تبكي السماء وكنها تنعي المفارق بالعويل المطار أعلن نهايات اللقاء يوم حلت رحلتك حان الرحيل يوم قالوا رحلتك اخر نداء أنتثر دمعي وأحس أني عليل أفلت يديني وأباجهش بالبكاء وراح ابكي لين ما يبقى قليل ان طلبتك لا تلّفت لـ الوراء لا تلّفت لجل دمعاتي تسيل المفارق داء و وصالك دواء لا تأخر في علاجي يالخليل انت لي مثل الهوى ولا الغذاء لا تعجب لو ترى حالي نحيل بعتبر بعدك لـ خفاقي بلاء وبا اتصبّر ياعسى صبرٍ جميل استمع لي لا تقاطعني رجاء ولد لي بالعين يالطرف الكحيل لا تحاتي لك في خفاقي ولاء ولو تغيب ويصبح غيابك طويل في غيابك صرت أنا رمز الوفاء ما حلى لي غيرك ومابي بديل لا تفوتك رحلتك آخر نداء وكان تسمح ضمني قبل الرحيل * ثلاث كلمات الشاعر / مبارك آل خليفه ثلاث كلمات مابي منك اسمعها بحروفها اللي على الاعذار مستنه لا اغلطت لك غلطه وودك ترقعها تقول مدري واحسبنه ويمكنه مدري واحسبه ويمكن عني اقلعها مخي خلاياه من ذا اللفظ منجنه دور لغيري وسولف له ووزعها دوّر لمنهو يحنّك كذب وتحنه ياللي توزع علومك قبل تجمعها لاصن صاحبك فالعب وايته بصنه واترك طبوعٍ بلا داعي تطبعها وارجع على اصلك بلا شكر وبلا منه لا تخلف الهقوه اللي فيك مطمعها ماعاد ينفع معك لكن ولكنه شف موقعك والعرب وشلون موقعها والناس نظراتها سكين منسنه ما فيه كلمه تنزلها وترفعها لا تخلط الصوت بين البح والخنه والمعركه لاجهلك اللي مولعها شف برقها لاح والرعاد له دنه ان كان عندك علومٍ خافيه ذعها ما فيه تكتيم دام الحرب منشنه وان غشتك صنعةٍ كلٍ تصنعها ماتوك الا عذاب القلب والونه وان غرتك لقمةٍ في البطن تبلعها بذكرك في كلام الشرع والسنه الركعه اللي على الانظار تركعها هي تدخل النار والا تدخل الجنه؟؟!! خل الدعاوي لشاريها وبايعها كلٍ على مهنته ويكيفه فنه ابعد عن اللي ضعيفاتٍ روابعها دام المقهوي يبهر هيله وبنه والفزعه اللي نويت العام تفزعها لا تحسب انها بوسط الصدر منكنه انا عزومي تشجعني واشجعها واشجع اللي يجي ظني على ظنه وانت انتبه من علومٍ ماتوقعها ولسانك افطن لهرجٍ ينطلق منه ثلاث كلمات مابي منه اسمعها كلمات مدري واحسبنه ويمكنه