نرحّب بجميع محبي الشعر في صفحتهم ملفى القصيد، ستجدون بإذن الله التنوّع في الطرح وحرصنا على رسمكم أجمل اللوحات الشعرية والتي تمنح الجمال لملفاكم.. ملفى القصيد. إعداد: محمد راشد المناعي لمراسلة الصفحة: mohdalmanna3i@gmail.com تابعوا مجموعة ملفى القصيد على موقع facebook بادخال عبارة «ملفى القصيد» بمحرك البحث في الموقع ، وعلى twitter: malfaelge9eed@
ضمني
الشاعرة / إيمان السليم

ضمني مابين رمشين الجفون
قل لعينك لا تقًّارني باحد
حبّني باحساس مفرط وبجنون
واعتبرني سر مايحكى لاحد
بيعهم لجلي وخلهم يسالون
عن غرامٍ حلّل ألغاز وعقد
قل لهم مادامهم مايعرفون
بان قلبك دون غيري قد جمد
خلّهم عن كل شيٍ يسكتون
واسمع انسانٍ بحبك ماجحد
وقل لهم قلبك مسور بالحصون
مايقدر له حساب ولا عدد
وابشر بقلبٍ لحبك مايخون
مايهزه شك ولا حتى حسد
خذ رساله دام في عهدك بكون
واسمع ابياتٍ تفيدك للابد
لي حضورٍ هيّج احساس السكون
ومن لمحني قال يافرد وصمد
شاعرة احساس فكري والعيون
والقصايد تنكتب فيني قصد

من غير ليش؟

الشاعر / عيسى بن علي المناعي
الشاعر القدير عيسى ين علي المناعي يجيب على أسئلة مستفزة بهذه المنظومة الشعرية الرائعة ..
عذربوني ..وقالوا :ليش راسه كبير؟
قومي الطيب..يا راس يهوم الفلاح
تسأل إن كان هذا ،صاير ..أو يصير
هاك من راسي اللي ضاري بالكفاح
عندي إمن الثوابت في مسير البصير
علم يدحض حجج من يرفضون الصلاح
رايي ..الناس واحد ..من غني وفقير
والزمن ..هو كفيــل إيميـزك يا قراح
لا بدالي من المخلوق شئ صغيـر
شمت ...لا تكبر الخله وتصبح نطـاح
وان لفاني من المثبور علم حقير
قلت أنا : كيف يالمثبور تبغي نجـاح؟؟
وان نقل لي مع النمام حكي مثير
صد وجهي عن النمام راع النبـاح
وان دهاني من الأدنين وقت عسير
قلت : ذولا جناحك يا عزيز الجنـاح
حلمي إيقول :فوّت لين طيري يطير
وان غدا الحلم نقطف ما بقي بالسلاح
يثمر الطيب بالطيب ولو هو يسير
والردي مثل رس لا وردتـه ميـاح
راعي الطيب يشبح بك ولو هو ضرير
والردي ما يشوفك لو عيونه صحـاح
راعي الطيب ينقل عنك حمل البعير
والردي لا زهمته ، عنك دبّر وشـاح
راعي الطيب ذكره قايم به سفير
والردي رأسماله …علته والصيــاح
مجلس العز يدهـل..لو ممده حصير
حيث ساسه حصا مجد و طينة ذبـاح
والردي مجلسه لو كان فرشه وثير
ينهجر ..حيث مابه غير علم الطلاح
ما نشدنا عن اللي حكيهم كالغثير
رد مشروههم بنحورهم ..(يا فـلاح)

التواصل الاجتماعي

الشاعر / محمد بن فطيس المري
محمد بن فطيس يهجو وسائل التواصل الاجتماعي بهذه القصيدة الإبداعية ..

التواصل الاجتماعي ما نفعنا
هو خراب المجتمع باب المهازل
التواصل الاجتماعي ماجمعنا
حط بين اقطارنا مثل العوازل
في عجاج العولمه والنت ضعنا
والعرب ماعاد تبغي كون هازل
التواصل الاجتماعي ما رفعنا
خايف ٍ ازيد فالتفصيل وآزل
اظهر خبوش العرب في مجتمعنا
وارتفع بين العرب من كان نازل

بعض العرب

الشاعر القدير / راشد شرار
تدري وش اللي غيّر الناس عالناس ..
افلوسها والا تراها انفوسها ..
بعض العرب في تبعها ترفع الراس ..
وبعض العرب ما تروم ترفع روسها ..
الارض فيها ناس ما تملك احساس ..
ما تملك الا في الحياة افلوسها ..
ياكم واحد ما بقى غير ينداس ..
وبعض العرب ما تستحق اندوسها ..
فيها فقر لكن لها عزّه وباس ..
خذت من الدنيا عظيم ادروسها ..
فيه ناس تغريها الجواهر والألماس ..
ما باقي الا تشمّها وتبوسها ..
وفيه ناس مثل الورد طاهر وحساس ..
ما تحتمل لمسة أيدين انجوسها ..
الصافي الوافي اذا بالقدم داس ..
اصبح تطرّي به العرب مرموسها ..
الرجل ما هو مظهر وشكل ولباس ..
محلا الرجال اللي فخر ملبوسها ..

على لندن

الشاعر / محمد مذكر ابن قحاف القحطاني

من أجمل القصائد العاطفية التي وصلتنا في ملفى القصيد من الشاعر المبدع محمد القحطاني ..

على طاري الذكرى وطاري المكان الزين
وطاري الغلا اللي حط فالقلب دوامه
نهار أول أمس العين قامت تشوف العين
وذا اليوم عيني من قسى البعد عوامه
تذكرت سجات القدم من قبل يومين
وأثرني نقضت الجرح وأزدادت آلآمه
وأنا والله أن ودي وودي إلى ذلحين
أسوق القدم من وين ما سارت أقدامه
عسى رايح الوسمي وانا رافع الكفين
على دارهم تبطي لياليه وأيامه
دياراً تخلي كل مافي الخفوق يبين
ديار الهواء والغيم والمزن وأنسامه
على لندن تحن المشاعر وهم سالين
ولاحدن سمع هجراع قلبي وهمهامه
عليها جزيل الشكر من وين حتى وين
لو انها تحقق حلم من كثرت أحلامه

يا حوثي

الشاعر / علي الهويريني

قل للمجوسي في صنعاء معتزل
الله أكبر تجري إنها السنن
إن الصدور إذا ضاقت بما رحبت
ضاقت بك البيد يا حوثي والمدن
فاذهب إلى غير رجع حيث جئت فلن
تبكيك صعدا ولا صنعا ولا عدن
فإن زيدٌ براءٌ منكم أنت و من
حثالة الفرس ممن قلّت السفن
إن كنت فرعون في صنعاء ربهمُ
فقل لهامان يبني الصرح تستبن
تأتيك من فوقه للحزم عاصفةٌ
في بطنها شررٌ فاضت به الكنن
تظنهُ عارضٌ في الأفق ممطركم
و فيه ريحٌ عقيمٌ صرصرٌ رعن
إن مسّك الشك يوماً في عزائمنا
فسل بذي قار يوماً خطه الزمن
أوصى النبي بها من فوق منبره
تضيع حكمتكم إن ضاعت اليمن
فهل لذي حجرِ فيما قلت سامعةً
أم أن ذي الحجر في آذانه طنن